"میں نے آخری فلم 2013 میں کی تھی پھر ایسا لگا جیسے کام سے کچھ وقفہ لینا چاہیے. بیٹی کی پیدائش ہوئی اور 2،3 برس کا وقفہ 8 سال کا ہوگیا. اس کے بعد لڑکا پیدا ہوا اور یوں 12 سال گزر گئے" یہ کہنا ہے بالی وڈ اداکار فردین خان کا جن کا شمار ایک دور میں صف اول کے اداکاروں میں کیا جاتا تھا. البتہ فلمی خاندان سے ہونے کے باوجود فردین خان شوبز سے بالکل علیحدہ ہوگئے اور حال ہی میں ان کی واپسی سنجے لیلیٰ بھنسالی کی فلم "ہیرامنڈی" سے ہوئی ہے. حالیہ انٹرویو میں فردین خان کا کہنا ہے کہ انھیں اداکاری سے لمبا وقفہ اس لئے لینا پڑا کیونکہ وہ فل ٹائم ڈیڈ تھے یعنی اپنے بچوں کی نگہداشت کررہے تھے. انھوں نے بچوں کے لئے جو بھی کیا انھیں اس پر فخر ہے لیکن وہ اپنے کام کو بہت یاد کرتے تھے. واضح رہے کہ شوبز سے دوری کے عرصے میں فردین خان کا وزن بھی بڑھ گیا تھا اس کے علاوہ ان کے جڑواں بچوں کی اموات اور بیوی سے علیحدگی کی خبریں بھی وائرل ہوئیں البتہ اداکار کے مطابق اب ان کی زندگی میں ٹہراؤ آچکا ہے اور وہ اپنا وزن کم کرنے میں بھی کامیاب ہوچکے ہیں.