"رنبیر ایک اچھے والد ہیں، لیکن میں عالیہ کو پوجا کے سامنے کچھ نہیں سمجھتا۔ نہ ٹیلنٹ، نہ خوبصورتی — میرے لیے میری بہن سب سے آگے ہے" فٹنس ایکسپرٹ اور مہیش بھٹ کے بیٹے راہول بھٹ نے ایک حالیہ پوڈکاسٹ میں اس وقت سب کو چونکا دیا جب انہوں نے اپنی سوتیلی بہن عالیہ بھٹ کو سگی بہن پوجا بھٹ سے کمتر قرار دے دیا۔ راہول، جو کارتیک آریان، عامر خان اور علی فضل جیسے اداکاروں کی جسمانی تبدیلیوں میں کلیدی کردار ادا کر چکے ہیں، انٹرویو کے دوران بہت کچھ بول گئے۔ عالیہ بھٹ سے متعلق بات کرتے ہوئے انہوں نے نہ صرف ان کی اداکاری بلکہ ان کی شکل و صورت کو بھی تنقید کا نشانہ بنایا۔ انہوں نے کہا، "عالیہ کامیاب ہے، ماں اچھی ہے، لیکن میری نظر میں وہ پوجا کے برابر نہیں آتی۔ پوجا بھٹ کا نہ صرف ٹیلنٹ اعلیٰ ہے بلکہ ان کی شخصیت بھی زیادہ نمایاں ہے۔ عالیہ ان کے سامنے آدھی بھی نہیں۔" جب رنبیر کپور کے بارے میں سوال ہوا تو راہول نے کہا، "بس اتنی عزت کرتا ہوں کہ وہ اچھے والد ہیں اور میری بہن کا خیال رکھتے ہیں، ان کی اداکاری پر میں کچھ نہیں کہہ سکتا۔" یہ بیان جیسے ہی سامنے آیا، سوشل میڈیا پر ہلچل مچ گئی۔ عالیہ بھٹ کے مداح اور ناقدین دونوں ہی اس پر اپنی رائے دینے میں مصروف ہو گئے، جب کہ فلمی دنیا میں ایک اور خاندانی تنازعے کی بو پھیل گئی۔