"براہِ مہربانی، مجھے صرف ایک بار آپ کے قدم چھونے دیں، یہ میری عاجزانہ خواہش ہے۔" تحسین سکینہ پاکستانی صوفی موسیقی کی عظیم گلوکارہ عابدہ پروین سے ملاقات کے دوران نوجوان گلوکارہ تحسین سکینہ کا ایک جذباتی لمحہ سوشل میڈیا پر وائرل ہوگیا ہے۔ ویڈیو میں دیکھا جا سکتا ہے کہ تحسین نے نہایت احترام کے ساتھ عابدہ پروین سے درخواست کی کہ وہ ان کے قدم چھونا چاہتی ہیں۔ اجازت ملنے پر انہوں نے جھک کر ان کے قدم چھوئے، جس کے بعد عابدہ پروین نے شفقت سے انہیں گلے لگا لیا اور دعائیں دیں: "خوش رہو، آباد رہو۔" View this post on Instagram A post shared by VeryFilmi (@veryfilmi) یہ منظر اگرچہ جذباتی اور عقیدت سے بھرپور تھا، تاہم اس پر سوشل میڈیا پر شدید تنقید بھی سامنے آئی ہے۔ کئی صارفین نے اس عمل کو غیر اسلامی قرار دیا اور کہا کہ کسی انسان کے آگے جھکنا یا قدم چھونا شِرک کے زمرے میں آتا ہے۔ ایک صارف نے لکھا، "ہماری قوم دوسروں کے قدموں میں بیٹھنے کو عبادت سمجھتی ہے۔" کسی اور نے طنزیہ انداز میں تبصرہ کیا، "جیسے جاوید اختر کے قدموں میں بیٹھنے والوں کو بھولے نہیں ہیں۔" کچھ نے عابدہ پروین کے احترام کو تسلیم کرتے ہوئے کہا کہ وہ عظیم فنکارہ اور روحانیت کی علمبردار ہیں، لیکن قدم چومنے جیسا عمل کسی طور قابلِ قبول نہیں۔ سوشل میڈیا پر یہ بحث جاری ہے کہ عقیدت اور عبادت کے درمیان حد کو کیسے پہچانا جائے، خاص طور پر ایسے وقت میں جب عوامی شخصیات کے ہر عمل کو لمحوں میں دنیا کے سامنے پیش کیا جا سکتا ہے۔