آرمی چیف فیلڈ مارشل عاصم منیر نے کہا ہے کہ پاکستان پر جنگ مسلط کی گئی تو بھرپور جواب دیں گے، خطے کے امن کے لیے مسلہ کشمیر کا پرامن حل ضروری ہے۔ آئی ایس پی آر کے مطابق فیلڈ مارشل عاصم منیر نے شہدائے "بنیان مرصوص" کو خراج عقیدت اور لواحقین سے اظہار یکجہتی کی تقریب سے خطاب کرتے ہوئے کہا کہ معرکۂ حق کی کامیابی قومی عزم اور یکجہتی کا ثبوت ہے۔ فیلڈ مارشل عاصم منیر کے مطابق بھارت کی جارحیت پسندی خطے کے امن کے لیے خطرہ ہے، پاکستان پر جنگ مسلط کی گئی تو بھرپور جواب دیں گے۔ آرمی چیف نے کہا کہ بھارت کی آبی دہشتگردی ناقابل قبول اور غیرقانونی ہے،مسئلہ کشمیر کا پرامن اور منصفانہ حل خطے کے امن کے لیے ضروری ہے، پاکستان میں دہشتگردی کی پشت پناہی بھارتی ریاست کر رہی ہے۔ فیلڈ مارشل عاصم منیر نے کہا کہ دہشتگردی کے خلاف قومی جنگ منطقی انجام تک پہنچائیں گے، مستقبل کی جنگ کے تقاضے جدید سوچ اور جدت کے طلبگار ہیں۔ آرمی چیف کی نوجوان افسران کو جذبے، تحقیق اور عزم سے قیادت کی تیاری کی ہدایت کی اور کمانڈ اینڈ اسٹاف کالج کوئٹہ کی پیشہ ورانہ خدمات کو سراہا۔