چائنا فلم ایڈمنسٹریشن اور چونگچنگ میونسپل پیپلز گورنمنٹ کے اشتراک سے منعقدہ فلم فیسٹیول میں پاکستانی سنیما کی معروف ہارر فلم ’دیمک‘ کو اہم اعزاز سے نوازا گیا ہے۔ فلم کو شنگھائی تعاون تنظیم  فلم فیسٹیول 2025 میں باضابطہ طور پر شرکت کے لیے منتخب کیا گیا ہے۔میڈیا رپورٹس کے مطابق یہ فیسٹیول 3 سے 7 جولائی 2025 تک یونگچوان، چونگچنگ، چین میں منعقد ہو گا، جس کی میزبانی چین شنگھائی تعاون تنظیم کے تحت کر رہا ہے۔فیسٹیول کا مقصد خطے کی 10 رکن ریاستوں اور 2 مبصر ممالک کے درمیان ثقافتی روابط اور فلمی تعاون کو فروغ دینا ہے۔فلم ’دیمک‘ کو اس فیسٹیول میں خطے کی دیگر فلموں کے ساتھ پیش کیا جائے گا جہاں فلمی نمائشوں، مقابلوں اور بین الاقوامی تعاون پر مبنی اجلاس بھی منعقد کیے جائیں گے۔یہ فیسٹیول چائنا فلم ایڈمنسٹریشن اور چونگچنگ میونسپل پیپلز گورنمنٹ کے اشتراک سے منعقد کیا جا رہا ہے۔فلم کے ہدایت کار رافع راشدی کو اس فیسٹیول میں خصوصی طور شرکت کے لیے مدعو کیا گیا ہے۔رافع راشدی کا کہنا ہے کہ یہ ہمارے لیے باعثِ فخر ہے کہ فلم ’دیمک‘ کو ایک عالمی پلیٹ فارم پر پاکستانی سنیما کی نمائندگی کا موقع ملا ہے۔جنوبی ایشیائی داستانوں اور وحشت پر مبنی کہانیوں کو جس طرح سے عالمی پزیرائی مل رہی ہے، وہ اس انتخاب کا ثبوت ہے۔’مانڈوی والا انٹرٹینمنٹ‘ کے تحت پاکستان بھر میں ریلیز کی جانے والی فلم ’دیمک‘ ملک بھر میں کامیابی کے جھنڈے گاڑنے کے بعد اب بین الاقوامی فلمی میلوں میں بھی شاندار پزیرائی حاصل کر رہی ہے۔