خیبرپختونخوا میں 20 تا25 جولائی مزید بارشوں کی پیشگوئی کی گئی ہے، جس سے صوبہ بھر کے متعدد علاقوں میں لینڈسلائیڈنگ و سیلاب کا خدشہ ظالر کرتے ہوئے الرٹ جاری کر دیا گیا ہے۔ محکمہ موسمیات پاکستان نے خیبر پختو نخوا میں 20 تا25 جولائی مزید بارشوں کی پیشگوئی ، اور مون سون کے نئے سپیل کے تحت تیزہواں اور گرج چمک کے ساتھ طوفانی بارشوں کا الرٹ جاری کیا ہے. ریجنل میٹ آفس پشاور کے مطابق مون سون کا نیا سسٹم صوبے میں داخل ہو رہا ہے، جس کے ساتھ مغربی ہوا کا ایک سلسلہ بھی شامل ہوگا جو بارشوں کو مزید شدید بنا سکتا ہے۔محکمہ موسمیات نے جن اضلاع میں بارش کا امکان ظاہر کیا ہے ان میں ہری پور، ایبٹ آباد ، مانسہرہ، چترال ، دیر، سوات، بونیر، مالاکنڈ، بٹگرام، شانگلہ، کوہستان، کولائی پالس کوہستان، تورغر، پشاور، مردان، صوابی، نوشہرہ، چارسدہ، باجوڑ، مہمند، خیبر، اورکزئی، کرم، کوہاٹ، ہنگو، بنوں، کرک، لکی مروت ، ڈیرہ اسماعیل خان، ٹانک ، شمالی و جنوبی وزیرستان شامل ہیں۔ صوبائی ڈیزاسٹر مینجمنٹ اتھارٹی (پی ڈی ایم اے) نے خبردار کیا ہے کہ شدید موسمی صورتحال کے سبب شہری علاقوں میں سیلابی صورتحال ، پہاڑی علاقوں میں لینڈ سلائیڈنگ اور معمولات زندگی متاثر ہونے کا خدشہ ہے، پی ڈی ایم اے نے اس حوالے سے تمام ڈپٹی کمشنرز کو مراسلہ جاری کرتے ہوئے ضلعی انتظامیہ کو ہدایت کی ہے کہ وہ ہائی الرٹ رہیں اور پیشگی حفاظتی اقدامات کو یقینی بنائیں۔ عوام اور سیاحوں کو بھی احتیاطی تدابیر اختیار کرنے کی ہدایت کی گئی ہے۔