پاکستان تحریک انصاف کی رہنما اور رکنِ قومی اسمبلی شاندانہ گلزار کے خلاف قومی سائبر کرائم تحقیقاتی ایجنسی (این سی سی آئی اے) نے وزیراعظم شہباز شریف اور اسرائیلی وزیراعظم نیتن یاہو کی مبینہ ملاقات سے متعلق جعلی ٹویٹ کرنے پر مقدمہ درج کر لیا ہے۔بدھ کے روز درج کی گئی ایف آئی آر میں سائبر کرائم ایکٹ کو بنیاد بنایا گیا ہے جس میں مؤقف اپنایا  گیا ہے کہ ملزمہ نے سوشل میڈیا پر ریاست مخالف مواد پھیلایا۔مقدمے میں شاندانہ گلزار کے سوشل میڈیا پلیٹ فارم ایکس پر کی گئیں مختلف ٹویٹس کو بنیاد بناتے ہوئے کہا گیا ہے کہ انہوں نے متعدد جعلی اور گمراہ کن ٹویٹس اور ویڈیوز شیئر کیں، جن میں ریاستی اداروں کے خلاف نفرت انگیز اور اشتعال انگیز بیانات شامل تھے۔اردو نیوز کو موصول ایف آئی آر کی کاپی کے مطابق ملزمہ نے ٹویٹ کے ذریعے نسلی اور لسانی نفرت کو ہوا دینے کی کوشش کی اور وزیراعظم پاکستان سے متعلق ایک جعلی تصویر اور غلط معلومات پھیلائیں۔ایف آئی آر میں مزید کہا گیا ہے کہ شاندانہ گلزار نے وزیراعظم کی اسرائیلی ہم منصب سے ملاقات کا الزام عائد کیا جس سے عوام میں خوف، بے چینی اور ریاستی اداروں کے خلاف بداعتمادی کی فضا پیدا ہوئی۔سائبر کرائم ایجنسی کے مطابق ابتدائی تحقیقات میں یہ بات ثابت ہوئی ہے کہ ملزمہ نے دانستہ طور پر فیک نیوز کے ذریعے ریاست مخالف بیانیہ آگے بڑھایا، جس پر شاندانہ گلزار کے خلاف پیکا 2016 کی دفعات 11، 20 اور 26 اے کے تحت مقدمہ درج کیا گیا ہے۔یاد رہے کہ شاندانہ گلزار نے وزیراعظم شہباز شریف کے دورۂ شرم الشیخ کے دوران ایک ویڈیو جاری کی تھی جس میں انہوں نے الزام لگایا تھا کہ وزیراعظم نے اسرائیلی وزیراعظم نیتن یاہو سے ملاقات کی ہے۔ تاہم بعد ازاں ویڈیو جعلی ثابت ہونے پر شاندانہ گلزار نے غلطی تسلیم کرتے ہوئے ویڈیو ہٹا دی تھی۔جعلی ویڈیو پوسٹ کرنے پر سوشل میڈیا صارفین کی جانب سے انہیں شدید تنقید کا سامنا کرنا پڑا جبکہ بعض صارفین نے ان کے خلاف پیکا کے تحت کارروائی کا بھی مطالبہ کیا۔