وفاقی حکومت نے سرکاری ملازمین کے لیے بڑا ریلیف پیکیج منظور کر لیا جس کے تحت ہاؤس رینٹ سیلنگ میں 85 فیصد اضافہ کر دیا گیا۔ ذرائع کے مطابق وفاقی کابینہ نے سمری کی منظوری سرکولیشن کے ذریعے دی جس کے بعد گریڈ 1 سے 22 تک کے تمام وفاقی سرکاری ملازمین اس فیصلے سے مستفید ہوں گے۔ نئے اضافے سے وفاقی ملازمین کو رہائش الاؤنس کی مد میں نمایاں ریلیف ملے گا اور یہ سہولت تمام وزارتوں، ڈویژنوں اور خودمختار اداروں کے مستقل ملازمین پر لاگو ہوگی۔ حکومت نے واضح کیا ہے کہ یہ فیصلہ بڑھتی ہوئی کرایوں کی شرح اور موجودہ معاشی دباؤ کے پیش نظر کیا گیا تاکہ ملازمین کو مالی مشکلات سے جزوی نجات دی جا سکے۔ ذرائع کے مطابق وزارتِ خزانہ نے اس فیصلے پر عمل درآمد کے لیے نوٹیفکیشن جاری کرنے کی تیاریاں مکمل کر لی ہیں۔ دوسری جانب سرکاری ملازمین کی مختلف تنظیموں نے کابینہ کے فیصلے کو مہنگائی میں کمی کی سمت مثبت اقدام قرار دیا۔