این سی آئی اے کرپشن اسکینڈل میں بڑی پیشرفت ہوئی ہے۔ تفتیشی ٹیم نے کارروائی کے دوران مختلف افسران سے 1 کروڑ 60 لاکھ 15 ہزار روپے سے زائد کی رقم برآمد کرلی۔ تفصیلات کے مطابق سابق ایڈیشنل ڈائریکٹر چوہدری سرفراز سے 1 کروڑ 25 لاکھ 48 ہزار روپے، اسسٹنٹ ڈائریکٹر شعیب سے 36 لاکھ 48 ہزار روپے، ڈپٹی ڈائریکٹر زوار سے 9 لاکھ روپے، سب انسپکٹر علی رضا سے 70 لاکھ روپے اور سب انسپکٹر یاسر گجر سے 19 لاکھ روپے برآمد کیے گئے۔ ذرائع کا کہنا ہے کہ ملزمان پر الزام ہے کہ انہوں نے مختلف کیسز میں اختیارات کا ناجائز استعمال کرتے ہوئے شہریوں سے بھاری رقوم وصول کیں۔ تحقیقات کے بعد ملزمان کو عدالت میں پیش کیا گیا جہاں عدالت نے تمام افسران کا تین روزہ جسمانی ریمانڈ منظور کرلیا۔تفتیشی ٹیم کے مطابق مزید انکشافات متوقع ہیں اور دیگر متعلقہ افسران کو بھی جلد شاملِ تفتیش کیا جائے گا۔