اینٹی نارکوٹکس فورس نے ملک کے مختلف شہروں میں منشیات فروشوں کے خلاف کارروائیاں کرتے ہوئے 5 افراد کو گرفتار کر لیا۔ ترجمان اے این ایف کے مطابق پانچ کارروائیوں کے دوران مجموعی طور پر 108.61 کلوگرام منشیات برآمد کی گئی، جن کی مالیت ایک کروڑ 12 لاکھ روپے سے زائد ہے۔ نارتھ ناظم آباد کراچی میں ایک یونیورسٹی کے قریب کارروائی کے دوران 36 کلوگرام چرس برآمد ہوئی۔ گرفتار شخص نے انکشاف کیا کہ وہ طلباء کو منشیات فروخت کرتا تھا۔ اسلام آباد ایئرپورٹ پر دبئی جانے والے مسافر سے آٹا گوندھنے والی مشین میں چھپائی گئی 1.7 کلوگرام آئس اور 480 ایکسٹیسی گولیاں برآمد ہوئیں۔ گلبرگ لاہور کے ایک کوریئر آفس سے دبئی بھیجے جانے والے پارسل میں جوتوں میں چھپائی گئی 70 گرام چرس ملی۔ سہراب گوٹھ کراچی میں کارروائی کے دوران 45.6 کلوگرام چرس جبکہ ملتان کے قریب ایک گاڑی سے 25 کلوگرام افیون برآمد ہوئی۔ اے این ایف کے مطابق تمام گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر کے مزید تحقیقات شروع کر دی گئی ہیں۔