وزیر اعلیٰ خیبر پختونخوا محمد سہیل آفریدی نے صوبے کی تمام بڑی سیاسی جماعتوں کے قائدین سے ٹیلیفونک رابطے کیے ہیں جن میں مولانا فضل الرحمٰن، ایمل ولی خان، سراج الحق، امیر مقام، آفتاب شیرپاؤ اور محمد علی شاہ باچا شامل ہیں۔ ترجمان کے مطابق، وزیر اعلیٰ نے تمام رہنماؤں سے صوبے کی مجموعی امن و امان کی صورتحال پر تفصیلی گفتگو کی۔ اس موقع پر محمد سہیل آفریدی نے کہا کہ صوبے میں امن کے قیام پر کوئی دو رائے نہیں، امن و استحکام حکومت کی اولین ترجیح ہے۔ اجلاس میں فیصلہ کیا گیا کہ صوبائی اسمبلی کی اِن ہاؤس کمیٹی کے تحت تمام سیاسی جماعتوں کے قائدین پر مشتمل جرگہ بلایا جائے گا تاکہ پائیدار امن کے لیے مشترکہ حکمتِ عملی تشکیل دی جا سکے۔ ذرائع کے مطابق اسپیکر صوبائی اسمبلی کی جانب سے تمام قائدین کو اس جرگے میں باضابطہ طور پر مدعو کیا جائے گا۔وزیر اعلیٰ نے واضح کیا کہ اختلافِ رائے جمہوریت کا حسن ہے مگر امن سب کا مشترکہ ہدف ہے اور تمام فریقین کو ساتھ لے کر ہی دیرپا استحکام یقینی بنایا جا سکتا ہے۔