"وقار یونس نے میرا کیریئر تباہ کیا۔ وہ ہر ایک کا کریئر برباد کرتے تھے، فرق صرف اتنا ہے کہ میں واحد بندہ ہوں جو کھل کر بات کر رہا ہوں۔ وہ مجھ سے جلتے تھے۔ انہیں یہ برداشت نہیں تھا کہ کم عمر میں میں نے اتنی مہنگی گاڑیاں اور پیسہ کیسے کما لیا۔ میری کامیابی اور دولت دیکھ کر انہوں نے مجھے نشانہ بنایا۔ وقت آئے گا تو میں ان کے اور بھی بہت سے متاثرین کے نام سامنے لاؤں گا۔" پاکستانی کرکٹ کی دنیا میں عمر اکمل کا نام کبھی صلاحیت، پاور ہٹنگ اور فٹنس کے ساتھ ساتھ تنازعات کی وجہ سے بھی گونجا۔ ایک ایسا کرکٹر جسے میدان میں بے خوف شاٹس اور غیر معمولی ٹیلنٹ نے راتوں رات مقبول کیا، لیکن پھر اچانک تنازعات، پابندیاں اور کرکٹ بورڈ کے ساتھ ٹکراؤ نے اس کی کہانی کو ایک تلخ موڑ دے دیا۔ معروف شاعر و میزبان وصی شاہ کے پروگرام میں شریک عمر اکمل نے برسوں سے دل میں جمع مایوسی اور غصے کو بالآخر الفاظ دے دیے۔ گفتگو میں انہوں نے براہِ راست سابق کپتان اور کوچ وقار یونس کو اپنی بربادی کا ذمہ دار قرار دیتے ہوئے کہا کہ ان کے کیریئر کو ذاتی انا اور حسد کی بھینٹ چڑھایا گیا۔ ان کے مطابق وقار یونس کو نوجوان عمر اکمل کی شہرت، کامیابی اور اچانک مالی خوشحالی کھٹکنے لگی، اور وہ اسی لمحے سے انہیں نشانہ بنانے پر تل گئے۔ یہ دعویٰ غیر معمولی نہیں، مگر انداز، لہجہ اور یقین نے اس بیان کو نئی بحث کا موضوع بنا دیا۔ کرکٹ کے شائقین جانتے ہیں کہ عمر اکمل ہمیشہ ایک سپر اسٹار کی طرح ابھرے، اور اسی صلاحیت کی بنیاد پر انہیں پاکستان کے مستقبل کا بڑا ہٹر سمجھا جاتا تھا۔ مگر بورڈ کے ساتھ تنازعات، ٹیم مینجمنٹ سے اختلافات، اور ڈسپلن کے معاملات نے انہیں رفتہ رفتہ سائیڈ لائن کر دیا۔ اب برسوں بعد انہوں نے وجہ کھول کر بیان کر دی ہے کہ ان کے مطابق یہ صرف غلطیاں نہیں تھیں، بلکہ ایک شخصی دشمنی نے انہیں میدان سے باہر کر دیا۔