وزیرِاعظم محمد شہباز شریف نے صحافیوں کے خلاف جرائم کے خاتمے کے عالمی دن کے موقع پر اپنے پیغام میں کہا ہے کہ آزاد، باخبر اور ذمہ دار صحافت کسی بھی جمہوری معاشرے کی بنیاد ہے۔ وزیراعظم نے کہا کہ صحافی عوام تک حقائق کی رسائی کو ممکن بناتے ہیں اور سچائی کے علمبردار ہوتے ہیں، تاہم ان کے خلاف تشدد، دھمکی یا انتقامی کارروائیاں دراصل آزادی اظہار پر حملہ ہیں۔ شہباز شریف نے ان تمام صحافیوں کو خراجِ تحسین پیش کیا جنہوں نے حق و سچ کے لیے مشکلات برداشت کیں، اور ان اہلِ قلم و میڈیا ورکرز کے خاندانوں سے اظہارِ یکجہتی کیا جنہوں نے اپنے پیاروں کو فرضِ منصبی کے دوران کھو دیا۔ وزیراعظم نے کہا کہ حکومتِ پاکستان آزادیِ صحافت کے تحفظ اور صحافیوں کو محفوظ ماحول فراہم کرنے کے لیے پرعزم ہے۔ ان کا کہنا تھا کہ حکومت ایسے تمام اقدامات کرے گی جن سے صحافیوں کے خلاف جرائم کی مؤثر تفتیش، انصاف کی فراہمی اور مجرموں کے خلاف قانونی کارروائی یقینی بنائی جا سکے۔ وزیراعظم نے بین الاقوامی برادری، میڈیا اداروں اور سول سوسائٹی سے بھی اپیل کی کہ وہ صحافیوں کے تحفظ اور اظہارِ رائے کی آزادی کے فروغ کے لیے اپنا کردار ادا کریں۔ انہوں نے کہا کہ آزاد صحافت ایک مضبوط، شفاف اور جمہوری پاکستان کی ضمانت ہے۔