پاکستان کے قومی سلیکٹرز نے ہیڈ کوچ مائک ہسن کے مشورے پر فیصلہ کیا ہے کہ آل راؤنڈر شاداب خان کی ٹی ٹوئنٹی ٹیم میں واپسی اس وقت ہوگی جب وہ آسٹریلیا میں ہونے والے بگ بیش ٹی ٹوئنٹی لیگ میں اپنی فارم اور فٹنس دونوں ثابت کریں گے۔ سلیکٹر کے قریبی ذرائع نے بتایا کہ شاداب کو آئندہ سال ہونے والے ورلڈ کپ کی پلاننگ میں رکھا گیا ہے لیکن اس شرط پر کہ پہلے وہ اپنی فارمر فٹنس ثابت کریں۔ شاداب جنہوں نے جون میں اپنے کندھوں کی تکلیف کے لیے انگلینڈ میں سرجری کروائی تھی اب پوری طرح صحت یاب ہوچکے ہیں اور کرکٹ بھی کھیلنا شروع کر دی ہے لیکن ان کو راولپنڈی میں ہونے والے تین ملکی ٹورنامنٹ میں موقع نہیں دیا گیا ہے۔ ذرائع نے بتایا کہ شاداب، محمد رضوان، حارث رؤف، بابر اعظم وغیرہ کی بگ بیش میں پرفارمنس کو بہت قریب سے جانچا جائے گا اور اسی بنیاد پر پاکستان ورلڈ کپ اسکواڈ کو شکل دی جائے گی۔ شاداب پاکستان ٹی ٹوئنٹی ٹیم کی کپتانی کر چکے ہیں اور پچھلے پانچ سال سے کم از کم ٹی ٹوئنٹی فارمیٹ میں ایک مستقل سلیکشن رہے ہیں۔