“میں اپنی زندگی اپنے لیے جی رہی ہوں۔ مجھے شو میں ماڈل کے طور پر بلایا گیا تھا، میں نے کوئی غلط کام نہیں کیا۔ میری گھٹنے کی سرجری ہو چکی ہے اور تھائیرائڈ بھی کافی خراب رہا، مگر اس کے باوجود لوگ عجیب قسم کی باتیں کر رہے ہیں۔ مجھے افسوس ہے کہ چند بیمار ذہنیت کے لوگ میرا مذاق بنا رہے ہیں، مگر میں فخر سے کہہ سکتی ہوں کہ میں ایک چھوٹی سوچ رکھنے والے معاشرے میں رہنے والی ‘بڑی’ لڑکی ہوں۔” ڈجیٹل دنیا میں ایک بار پھر متھیرا سوشل میڈیا بحث کا مرکز بن گئی ہیں۔ حالیہ فیشن شو کی ایک ویڈیو نے انہیں تنقید کی لپیٹ میں ڈال دیا، جہاں ان کی ریمپ پر واک نے مختلف صارفین کو نشانہ بنانے کا موقع فراہم کیا۔ ویڈیو وائرل ہونے کے بعد کئی لوگ ان کے انداز، جسمانی خدوخال اور وزن پر تبصرے کرتے دکھائی دیے۔ کچھ نے دعویٰ کیا کہ وہ پہلے زیادہ پُراعتماد لگتی تھیں، جبکہ کئی نے غیر مناسب الفاظ استعمال کرتے ہوئے ان کی تضحیک کی۔ کسی صارف نے طنز کرتے ہوئے لکھا کہ وہ اس سے بہتر واک کر سکتا ہے، جبکہ چند افراد نے حد پار کرتے ہوئے متھیرا کو ’’ملازمہ جیسا‘‘ قرار دے دیا، جس پر بحث مزید شدت اختیار کر گئی۔ مسلسل نازیبا تبصروں نے ماڈل کو برہم کر دیا اور انہوں نے اپنا مؤقف صاف انداز میں سامنے رکھا۔ متھیرا نے واضح کیا کہ وہ صرف اپنی صحت پر توجہ دیتے ہوئے ایک پرسکون زندگی گزارنے کی کوشش کر رہی ہیں۔ ان کا کہنا تھا کہ ان کی میڈیکل ہسٹری کو نظرانداز کرتے ہوئے لوگ بلاوجہ ان پر تنقید کر رہے ہیں، حالانکہ وہ اپنی ذمہ داری پوری کرتے ہوئے شو میں بطور ماڈل شریک ہوئیں۔ ان کے مطابق چند منفی ذہنیت کے پیجز بلاوجہ انہیں نشانہ بنا رہے ہیں، جو افسوسناک ہے۔ متھیرا نے گفتگو کا اختتام اس اعلان کے ساتھ کیا کہ وہ دوسروں کے جملوں سے نہیں بلکہ اپنی خوشی سے جینا چاہتی ہیں، اور اسی سوچ نے انہیں مضبوط رکھا ہوا ہے۔