اے ٹی پی چیلنجرز کپ کے تاریخ ساز ایونٹ کے ڈبلز فائنل میں پاکستانی جوڑی اعصام الحق اور مزمل مرتضیٰ کو سخت اور کانٹے دار مقابلے کے بعد شکست کا سامنا کرنا پڑا۔ یہ اعصام الحق کے کیریئر کا آخری انٹرنیشنل فائنل تھا جسے وہ جیت نہ سکے۔ پاکستان میں پہلی بار منعقد ہونے والے اے ٹی پی چیلنجرز کپ میں پاکستانی ڈبلز ٹیم کی فائنل تک رسائی ایک بڑا اعزاز قرار دی گئی۔ پی ٹی ایف ٹینس کمپلیکس اسلام آباد میں کھیلے گئے فائنل میں چیک ریپبلک کے ڈومینک پلان اور قازقستان کے ڈینس ایوسیو نے شاندار کارکردگی کا مظاہرہ کرتے ہوئے اعصام، مزمل جوڑی کو 7-6 اور 6-4 سے شکست دی۔ فائنل کے اختتام کے ساتھ ہی پاکستان کے مایہ ناز ٹینس اسٹار اعصام الحق قریشی بین الاقوامی ٹینس سرکٹ سے باقاعدہ طور پر ریٹائر ہوگئے جس پر شائقینِ ٹینس نے انہیں بھرپور خراجِ تحسین پیش کیا۔ اعصام الحق نے اپنے الوداعی بیان میں کہا کہ انہیں خوشی ہے کہ انہوں نے دنیا بھر میں پاکستان کا نام روشن کیا۔ انہوں نے سپورٹ کرنے والے تمام مداحوں کا شکریہ ادا کرتے ہوئے بتایا کہ وہ نئے کھلاڑیوں کو آگے لانے کے لیے کوششیں جاری رکھیں گے۔