آج 29 نومبر کو اقوام متحدہ کی قرار داد کے تحت مظلوم فلسطینی عوام کے ساتھ اظہار یکجہتی کا عالمی دن منایا جا رہا ہے۔ اقوام متحدہ کی جنرل اسمبلی نے 2 دسمبر 1977 کو ایک قرارداد منظور کی تھی جس میں تمام رکن ممالک نے اتفاق کیا کہ ہر سال 29 نومبر کو فلسطینی عوام کے حق میں یکجہتی کا دن منایا جائے گا۔ اس قرارداد میں عالمی پائیدار امن کے لیے فلسطین کے دو ریاستی حل کو ناگزیر قرار دیا گیا تھا۔ اقوام متحدہ کی قرارداد کے باوجود فلسطین میں اسرائیلی جارحیت جاری ہے۔ 8 اکتوبر 2023 سے جاری بمباری میں 70 ہزار کے قریب فلسطینی شہید اور دو لاکھ سے زائد زخمی ہو چکے ہیں، جن میں نصف سے زائد خواتین اور بچے شامل ہیں۔ غزہ کے بڑے اسپتال تباہ ہو چکے ہیں اور کئی شہر زمین بوس ہو گئے ہیں۔ پناہ گزین کیمپوں میں رہنے والے فلسطینی شدید مشکلات، خوراک، صاف پانی اور ادویات کی کمی کا سامنا کر رہے ہیں۔ سخت سردی اور بارش نے ان کی مشکلات میں اضافہ کر دیا ہے۔ اسرائیل نے امدادی سامان بھی سرحد پر روک رکھا ہے۔ دنیا کے کئی شہروں میں آج جلوس، ریلیاں اور احتجاجی مظاہرے ہو رہے ہیں، جن میں غزہ پر قابض اسرائیلی فورسز کی وحشیانہ کارروائیوں کو بے نقاب کیا جا رہا ہے۔ شرکاء فلسطینی عوام کی حمایت میں نعرے لگا رہے ہیں جبکہ عالمی برادری اور انسانی حقوق کی تنظیموں نے بھی اس دن کی مناسبت سے اسرائیلی حملوں کی فوری روک تھام کا مطالبہ کیا ہے۔