“میری ویڈیو وائرل ہونے کے بعد کچھ بالی ووڈ اداکاروں نے مجھ سے رابطہ کیا۔ کئی لوگ چاہتے تھے کہ میں بھارت آ کر ایک میوزک ویڈیو میں کام کروں، لیکن میں نے سب آفرز ٹھکرا دیں۔ یہاں لوگوں نے مجھے ڈرایا کہ اگر میں بھارت گئی تو پاکستان میں مجھے کوئی کام نہیں ملے گا۔ مجھے اُس وقت واقعی خوف آیا کہ کہیں بھارت جا کر پھنس نہ جاؤں۔ مجھے انڈین انڈسٹری کے بارے میں زیادہ علم نہیں تھا، کیونکہ تب بہت کم پاکستانی وہاں کام کرچکے تھے اور میں بھارت، پاکستان کی صورتحال سے بھی زیادہ واقف نہیں تھی۔ میرے ابو میرے ساتھ تھے اور جانے کے لیے تیار بھی تھے، مگر میں نے پھر بھی انکار کردیا۔ آج کل میرے پاس کوئی آفر نہیں ہے، بس ٹک ٹاک لائیو کرتی ہوں اور ہفتے کے ڈھائی لاکھ روپے کمالیتی ہوں۔”
ایمنسٹری ڈانس کی اس نئی ملکہ، عائشہ اظہر، جس نے 2022 میں دوست کی شادی پر “میرا دل یہ پکارے آجا” پر رقص کرکے راتوں رات شہرت کی بلندیوں کو چھو لیا تھا، ایک بار پھر خبروں میں ہیں۔ اس بار ان کی وائرل ویڈیو یا کوئی نیا ڈانس کلپ نہیں بلکہ بالی ووڈ کی جانب سے ملنے والی بڑی آفرز کو ٹھکرانے کا انکشاف ہے، جس نے سوشل میڈیا پر نئی بحث چھیڑ دی ہے۔
عائشہ نے اپنی زندگی کے اس دلچسپ موڑ کا پردہ اٹھایا۔ ان کا کہنا تھا کہ بھارت کی بڑی میوزک کمپنیاں اور معروف اداکار ان سے رابطے میں آئے تھے، مگر انہیں یہ قدم اٹھانے میں ہچکچاہٹ محسوس ہوئی۔ ایک عام پاکستانی لڑکی کے لیے اچانک بین الاقوامی شہرت کا دباؤ، سرحد کے اُس پار کے حالات، اور انڈسٹری کے نظام سے ناواقفیت، سب کچھ ان کیلئے خوف کا باعث بنا۔
عائشہ کے مطابق اُن کے والد مکمل طور پر اُن کے ساتھ تھے اور بھارت جانے کے لیے بھی تیار تھے، مگر فیصلہ آخرکار انہوں نے خود لیا۔ انہوں نے نہ صرف انکار کیا بلکہ کسی قیمت پر شہرت کے نام پر رسک نہ لینے کا اعلان بھی کیا۔ یہی بات شائقین کے لیے حیران کن بھی تھی اور قابلِ تعریف بھی۔
دلچسپ بات یہ ہے کہ دنیا ایک طرف انہیں بالی ووڈ میں دیکھنے کی خواہش رکھتی ہے، مگر عائشہ اس وقت ٹک ٹاک لائیو کے ذریعے اچھی خاصی آمدنی حاصل کررہی ہیں۔ ان کا کہنا ہے کہ وہ ہفتے کے ڈھائی لاکھ روپے تک کما لیتی ہیں، اور یہی ان کے لیے کافی ہے۔
عائشہ اظہر کا یہ کھرا اعتراف نہ صرف سوشل میڈیا پر گرم خبر بن چکا ہے بلکہ ایک بار پھر ان کے نام کو ٹرینڈز کی فہرست میں لے آیا ہے۔ ایسا لگتا ہے کہ ’میرا دل یہ پکارے آجا‘ کی یہ لڑکی، چاہے بالی ووڈ جائے یا نہ جائے، پاکستان کی سوشل میڈیا دنیا میں طوفان ضرور کھڑا کرتی رہے گی۔