پاکستان کے کپتان سلمان علی آغا پُراعتماد ہیں کہ پاکستان کی ٹیم اب پوری طرح سے آئی سی سی ٹی ٹوئنٹی ورلڈ کپ کے لیے تیار ہے۔ سلمان نے اتوار کی شب ٹرائی سیریز فائنل جیتنے کے بعد میڈیا سے گفتگو میں کہا کہ پچھلے کئی ماہ سے ٹی ٹوئنٹی ٹیم کو مضبوط کرنے کے لیے مختلف کھلاڑیوں کو مواقع دیے جا رہے ہیں۔ اب مجھے لگتا ہے کہ ہماری ٹیم ورلڈ کپ کے لیے پوری طرح تیار ہے اور جن پلیئرز کو ہم نے لایا ان سب نے اچھا پرفارم کیا ہے۔ ان کا ماننا ہے کہ پاکستان ٹیم مینجمنٹ نے وہ 15 لڑکے تیار کرلیے ہیں جو ٹی ٹوئنٹی ٹیم کو آگے لے کر چلیں گے۔ اگلے سال فروری اور مارچ میں آئی سی سی ٹی ٹوئنٹی ورلڈ کپ بھارت اور سری لنکا میں منعقد ہوگا لیکن پاکستان سارے میچز سری لنکا میں ہی کھیلے گا جہاں پر پچز اسپنرز کے لیے سازگار ہوتی ہیں۔ سلمان جن کو دسمبر 2024 میں ٹی ٹوئنٹی کا کپتان بنایا گیا تھا اب تک اپنی ٹیم کو تین فائنلز میں کھلا چکے ہیں اور ایشیا کی بھارت کے علاوہ ساری ٹیموں کو شکست دے چکے ہیں۔ انہوں نے کہا کہ پاکستان کرکٹ کی خوش قسمتی ہے کہ اس وقت ٹی ٹوئنٹی طرز کے لیے ہمارے پاس اچھے آل راؤنڈرز ہیں جو پرفارم بھی کر رہے ہیں اور کیونکہ ورلڈ کپ میں ہم نے سری لنکا میں میچز کھیلنے ہیں اس سے ہمیں فائدہ ہوگا۔ پاکستان اب اپنی اگلی ٹی ٹوئنٹی سیریز جنوری کے آخر میں آسٹریلیا سے کھیلے گا اور شاید اس سے پہلے پاکستان سری لنکا میں بھی تین ٹی ٹوئنٹی میچز کھیلے۔