بھارت کے سابق کپتان اور مایہ ناز بیٹسمین ویرات کوہلی نے واضح کر دیا ہے کہ وہ ٹیسٹ کرکٹ سے اپنی ریٹائرمنٹ واپس نہیں لے رہے۔ بھارتی میڈیا میں پچھلے چند دنوں سے یہ خبریں چل رہی ہیں کہ ویرات کوہلی نے بھارتی کرکٹ بورڈ کو ٹیسٹ کرکٹ میں واپس آنے کے ارادے سے متعلق آگاہ کردیا ہے، مگر کوہلی نے گزشتہ روز ساؤتھ افریقہ کے خلاف پہلے ون ڈے انٹرنیشنل میں 135 رنز کرنے اور اپنی ٹیم کو جیت دلانے کے بعد واضح کردیا کہ وہ فی الحال صرف ون ڈے کرکٹ پر اپنی توجہ مرکوز رکھنا چاہتے ہیں۔ مگر کوہلی کے زوردار اننگز اور ایک اور سابق کپتان روہت شرما کی نصف سینچری نے بھارتی کرکٹ میں مزید افواہ کا بازار گرم کردیا ہے کہ شاید اسی وجہ سے بی سی سی آئی نے اسی ہفتے بھارتی ٹیم کا ہیڈ کوچ گوتم گمبھیر اور چیف سلیکٹر اجیت اگرکار کو ایک میٹنگ کے لیے بلایا۔ اس میٹنگ کو بہت اہمیت دی جا رہی ہے کیونکہ ساؤتھ افریقہ سے ٹیسٹ سیریز دو صفر سے ہارنے کے بعد گمبھیر اور اگرکار پر الزامات عائد کیے گئے ہیں کہ یہ اپنے من پسند کھلاڑی کو کھلا رہے ہیں اور سینئر کھلاڑیوں کو یہ ٹیم میں نہیں رکھنا چاہتا۔ ساتھ ہی ساتھ یہ بات بھی گرم ہے کہ اس وقت کوہلی اور روہت دونوں کے تعلقات گمبیر کے ساتھ سرد ہیں۔ یاد رہے کہ روہت اور ویرات نے 2027 میں ہونے والے 50 اوورز کے ورلڈ کپ میں کھیلنے کا ارادہ بتا دیا ہے اور اس کے بعد گمبھیر اور اگرکار کی طرف سے کوئی زیادہ مثبت رد عمل سامنے نہیں آیا۔