بھارتی ریاست ہریانہ کے شہر روہتک میں بین الاقوامی پیرا ویٹ لفٹنگ ایتھلیٹ روہت کو خاتون کو ہراسانی سے بچانے کے دوران شدید تشدد کے بعد قتل کر دیا گیا۔ پولیس کے مطابق ابتدائی جھگڑا سیلفی لینے کے تنازع پر ہوا تھا۔ بھارتی میڈیا کے مطابق شادی کی تقریب کے دوران تقریباً 10 مہمانوں نے روہت پر ہتھیاروں اور ڈنڈوں سے حملہ کیا۔ ایتھلیٹ کو فوری طور پر اسپتال منتقل کیا گیا لیکن دو روز تک علاج کے باوجود وہ جانبر نہ ہو سکے۔ ذرائع کے مطابق راہول نامی شخص نشے کی حالت میں خواتین پر قابل اعتراض الفاظ استعمال کر رہا تھا جس پر روہت نے اسے روکنے کی کوشش کی اور ابتدائی جھگڑا ہوا۔ بعد ازاں شادی کی تقریب سے واپسی کے دوران روہت کی گاڑی کو روک کر اس پر ڈنڈوں اور لوہے کی راڈوں سے حملہ کیا گیا جس کے نتیجے میں وہ شدید زخمی ہو گیا۔ پولیس نے واقعے کی تحقیقات شروع کر دی ہیں اور حملہ آوروں کی گرفتاری کے لیے چھاپے مارنے کا عمل جاری ہے۔