راولپنڈی کی انسدادِ دہشت گردی کی خصوصی عدالت نے علیمہ خانم کی جانب سے عدالت کے دائرہ اختیار کے خلاف دائر درخواست خارج کردی۔ محفوظ فیصلہ خصوصی عدالت کے جج امجد علی شاہ نے سنایا۔ فیصلہ سنائے جانے کے وقت علیمہ خانم اپنے وکیل محمد فیصل ملک اور حسنین سنبل کے ہمراہ کمرہ عدالت میں موجود تھیں۔ مقدمہ 26 نومبر کو تھانہ صادق آباد میں درج ہوا تھا۔ آج کی سماعت میں عدالت کے دائرہ اختیار سے متعلق درخواست پر دلائل مکمل کیے گئے، جسے عدالت نے مسترد کر دیا۔ استغاثہ کی طرف سے پراسیکیوشن ٹیم سیکیوٹر ظہیر شاہ کی سربراہی میں عدالت میں موجود رہی۔ استغاثہ کے 13 طلب کیے گئے گواہان آج بھی اپنی شہادت ریکارڈ نہ کرا سکے۔ عدالت نے مقدمے کی مزید سماعت 4 دسمبر تک ملتوی کردی اور تمام طلب کردہ 13 گواہان کو دوبارہ نوٹس جاری کر دیے ہیں۔ اگلی سماعت پر گواہوں کی شہادت قلم بند کی جائے گی۔