کراچی میں راشن کی تقسیم کے دوران بھگدڑ، 11 افراد ہلاککراچی سائیٹ ایریا میں زکوۃ اور آٹے کی تقسیم کے دوران بھگدڑ میں بچوں سمیت گیارہ افراد ہلاک ہوگئے ہیں۔ انتظامیہ کا کہنا ہے کہ سات افراد کو گرفتار کرلیا گیا ہے۔یہ واقعہ جمع کی شام شہر کے سائیٹ ایریا میں پیش آیا ہے، ڈپٹی کمشنر کیماڑی مختیار ابڑو نے بی بی سی کو بتایا کہ ایس کے ڈائننگ نامی فیکٹری میں زکوۃ کی نقد رقم اور آٹا تقیسم کیا جا رہا تھا جس کے دوران خواتین اور بچوں کی ایک بڑی تعداد وہاں جمع ہوگئی تھی اس دوران وہاں بھگدڑ مچ گئی۔انہوں نے بتایا کہ اس وقت تک پانچ سے زائد افراد ہلاک ہیں اور متعدد زخمیوں کو ہپستال پہنچایا جا رہا ہے۔ تاہم ڈاکٹر سمیعہ سید نے تصدیق کی ہے کہ اس وقت تک دس افراد ہلاک ہوچکے ہیں۔ڈپٹی کمشنر کے مطابق ضلعی انتظامیہ اور پولیس کی اجازت کے بغیر راشن اور زکوۃ کی تقیسم کی جا رہی تھی۔ پولیس نے فیکٹری کے مینجر سمیت سات افراد کو گرفتار کرلیا ہے اور اس وقتے میں غفلت برتنے پر مقدمہ بھی دائر کیا جا رہا ہے۔ڈی آئی جی عرفان بلوچ نے بی بی سی کو بتایا کہ فیکٹری مالکان ماہ رمضان میں ہر سال زکوۃ اور راشن تقیسم کرتے ہیں اورجمعے کے دن تیسرا روز تھا۔ اس سے قبل دو روز سو کے قریب لوگ آئے تھے لیکن جمعے کی شام ان کی تعداد دوگنی ہوگئی دھکم پیل کے بعد بھگدڑ مچ گئی اور لوگ پیروں تلے روندے گئے۔انہوں نے بتایا فیکٹری کے احاطے میں پانی بھرگیا اب کسی نے شرارت کرکے پانی چھوڑا یا پائپ پھٹ گیا اس کی تحقیقات کی جارہی ہے۔یاد رہے کہ نورس چورنگی کے قریب پیش آنے والے اس حادثے میں ہلاک ہونے والوں میں سات سال سے لیکر65سال کی عمر کے افراد شامل ہیں۔فلاحی تنظیم ایدھی فاونڈیشن کے اہلکار سعد ایدھی نے بی بی سی کو بتایا کہ گزشتہ دو روز سے فیکٹری مالکان لوگوں میں دو دو ہزار نقد تقسیم کر رہے تھے۔ یہ سن کر آج بڑی تعداد میں لوگ جمع ہوگئے لیکن آج تقیسم نہیں ہوئی لوگوں کو ہٹانے کے لیے مارپیٹ بھی ہوئی، اس دوران بھگدڑ مچ گئی اور لوگ گر گئے وہاں گٹر کا پانی بھی موجود تھی جو بھی لوگوں کے ناکوں سے اندر چلا گیا اور بعض ہلاکتیں اس کی وجہ سے بھی ہوئیں۔
|