وزارت داخلہ نے ملک کے بڑے شہروں کی یونیورسٹیوں اور کالجوں میں منشیات کی فروخت اور استعمال سے متعلق ہوشربا تفصیلات قومی اسمبلی میں پیش کر دیں۔
قومی اسمبلی اجلاس کے دوران وقفہ سوالات میں بتایا گیا کہ وزارت داخلہ کی ہدایت پر ملک بھر کے تعلیمی اداروں میں منشیات کے استعمال سے متعلق سروے جاری ہے جو 2026 میں مکمل ہوگا۔ سروے کی تکمیل کے بعد ملک بھر کی جامعات اور کالجوں میں نشہ آور اشیاء کے استعمال کا درست اندازہ سامنے آئے گا۔
ایوان کو بتایا گیا کہ وزیراعظم آفس اور جی ایچ کیو کی ہدایات پر انسداد منشیات فورس (اے این ایف) نے تعلیمی اداروں میں وسیع پیمانے پر آپریشنز کیے۔ رپورٹ کے مطابق اے این ایف نے ملک بھر کی 263 یونیورسٹیوں میں 369 آپریشن کیے، جن کے دوران 1427 کلوگرام سے زائد منشیات ضبط کی گئی۔
وزارت داخلہ کے مطابق ان کارروائیوں کے دوران منشیات اسمگلنگ میں ملوث 426 افراد کو گرفتار بھی کیا گیا۔