حکومت پنجاب نے اعلان کیا ہے کہ لاہور میں ٹرام سروس آئندہ سال فروری 2026 سے شروع کردی جائے گی۔ صوبائی وزیر ٹرانسپورٹ بلال اکبر کے مطابق ٹرام کا ٹیسٹ کامیاب ہوگیا ہے۔ٹرام سروس ٹھوکر نیاز بیگ سے ہربنس پورہ تک چلائی جائے گی۔ ٹرام میں 270 نشستوں کی گنجائش ہوگی اور منصوبے پر 30 لاکھ ڈالر لاگت آئے گی۔ بلال اکبر نے مزید بتایا کہ صوبائی حکومت نے فیصل آباد اور گوجرانوالہ میں بھی میٹرو ٹرین چلانے کا فیصلہ کیا ہے۔ ان کے مطابق فیصل آباد میٹرو ٹرین روزانہ 3 لاکھ مسافروں کو سہولت فراہم کرے گی جس پر 110 ملین ڈالر لاگت آئے گی جبکہ گوجرانوالہ میٹرو ٹرین یومیہ 1 لاکھ 40 ہزار مسافروں کو سہولت دے گی اور اس منصوبے پر 50 ملین ڈالر لاگت آئے گی۔ وزیر ٹرانسپورٹ کا کہنا تھا کہ لاہور میں موٹرسائیکل اور گاڑیوں کے بڑھتے ہوئے استعمال کے باعث ماحولیاتی آلودگی میں اضافہ ہورہا ہے اس لیے ٹرام اور میٹرو ٹرین منصوبے ماحولیاتی آلودگی پر قابو پانے کی ایک بڑی کوشش ہیں۔