وفاقی حکومت نے گھریلو صارفین کے لیے ملکی گیس پر نئے کنکشن لگانے پر مستقل پابندی عائد کرتے ہوئے پہلے سے وصول شدہ 30 لاکھ درخواستوں کو منسوخ کرنے کی ہدایت کر دی ہے۔
رپورٹ کے مطابق پیٹرولیم ڈویژن نے وفاقی کابینہ سے منظور شدہ نیا فریم ورک سوئی سدرن اور سوئی ناردرن کو ارسال کیا ہے جس کے مطابق اب صرف درآمدی گیس پر کنکشن فراہم کیے جائیں گے جن کے لیے 9 شرائط مقرر کی گئی ہیں۔
وفاقی حکومت نے گھریلو صارفین کو گیس کنکشنز دینے کیلئے نئی پالیسی گائیڈ لائنز جاری کر دی ہیں جس کے تحت سوئی سدرن اور ناردرن ایک سال میں 50 فیصد صارفین کو ارجنٹ فیس کے ساتھ گیس کنکشن فراہم کر سکے گی اور ارجنٹ فیس ادا کرنے والے صارفین کو 3 ماہ میں درآمدی گیس پر نیا کنکشن فراہم کر دیا جائے گا۔
علاوہ ازیں ایک سال منقطع رہنے والے گھریلو گیس کنکشن کے صارفین کو بھی درآمدی گیس کا کنکشن ملے گا جب کہ درآمدی گیس کنکشن کا ٹیرف ملکی گیس کے مقابلے میں 70فیصد زیادہ ہوگا۔