پنجاب ریونیو اتھارٹی کی تازہ ترین رپورٹ کے مطابق حالیہ سیلاب نے صوبے بھر میں بڑے پیمانے پر تباہی مچائی ہے۔ رپورٹ کے مطابق پنجاب کے 27 اضلاع اور 64 تحصیلوں میں 3 ہزار 775 موضع براہِ راست متاثر ہوئے ہیں۔
سیلاب سے مکانات کو شدید نقصان پہنچا، 63 ہزار 200 پکے مکانات اور 3 لاکھ 9 ہزار 684 کچے مکانات متاثر یا منہدم ہوگئے۔ متاثرین کی صحیح تعداد اور نقصانات کا تخمینہ لگانے کے لیے صوبائی حکومت نے جامع سروے کا آغاز کردیا ہے۔
رپورٹ میں بتایا گیا ہے کہ سروے ٹیموں میں اربن یونٹ، ریونیو ڈیپارٹمنٹ، محکمہ زراعت اور پاک آرمی کے نمائندے شامل ہوں گے تاکہ نقصانات کا درست تخمینہ لگایا جاسکے اور متاثرہ خاندانوں کو بروقت امداد فراہم کی جاسکے۔
حکام کے مطابق سروے کی تکمیل کے بعد نقصانات کے ازالے اور متاثرین کی بحالی کے لیے مالی پیکج اور ریلیف اقدامات کا اعلان کیا جائے گا۔