پاکستان سپر لیگ کی فرنچائزز کے مالکان کے دباؤ میں آکر آج پاکستان کرکٹ بورڈ نے لاہور میں ایک اہم اجلاس رکھا ہے جس میں پی ایس ایل کے معاملات اگلے ہونے والے ٹورنامنٹس پر گفتگو اور فیصلے کیے جائیں گے۔ اجلاس اس وقت بلایا گیا جب چھ کے چھ فرنچائزز کے مالکان نے کرکٹ بورڈ پر دباؤ ڈالا کہ ان کو پی ایس ایل کے بارے میں ہونے والے تمام کنٹریکٹس اور فیصلوں سے آگاہ کیا جائے۔ آج پی ایس ایل کے سی ای او سلمان نصیر ودیگر حکام اجلاس میں سارے مالکان کو بریفنگ دیں گے۔ ایک فرنچائز کے ذرائع نے بتایا کہ تمام فرنچائزز مالکان نے پی سی بی سے کہا تھا کہ پی ایس ایل کو لے کر ان کو کافی خدشات ہیں اور ان کو حالیہ ہونے والی ٹائٹل اسپانسرشپ ڈیلڈ اور باقی معاملات جیسے کہ ٹیم کی نئی ویلیویشن وغیرہ پر بالکل اندھیرے میں رکھا گیا ہے، اور وہ چاہتے ہیں کہ وہ بھی تمام اہم فیصلوں کا حصہ بنیں۔ پی ایس ایل حکام نے آج کی میٹنگ کے لیے ملتان سلطان کو بھی دعوت دی ہے۔ فرنچائزز کو بے چینی ہے کہ ویلیویشن کے بعد ان کی فرنچائز فیس کتنی بڑھائی جائے گی اور اگلے پی ایس ایل ایونٹس میں کس طرح سے پی سی بی فرنچائزز کے ساتھ معاملات رکھے گی۔