شہر قائد میں یوٹیوبر محسن اور ان کے کیمرہ مین کو فائیو اسٹار چورنگی کے قریب ڈاکوؤں نے لوٹ لیا۔ محسن کے مطابق وہ خستہ حال سڑک کی ویڈیو بنا رہے تھے کہ اسی دوران دو موٹر سائیکل سوار ڈاکو اچانک موقع پر آ گئے اور موبائل فون اور نقدی چھین کر فرار ہو گئے۔ یوٹیوبر محسن نے بتایا کہ لوٹے گئے موبائل فون میں ان کا اہم ڈیٹا محفوظ تھا جس کے ضائع ہونے کے خدشے پر وہ شدید پریشانی کا شکار ہیں۔ انہوں نے واقعے سے متعلق اپنا ویڈیو بیان سوشل میڈیا پر شیئر کیا جو دیکھتے ہی دیکھتے وائرل ہو گیا۔ واقعے کے بعد سوشل میڈیا صارفین اور فالوورز میں شدید غم و غصہ پایا جا رہا ہے۔ محسن نے عوام سے اپیل کی ہے کہ سڑکوں پر ویڈیو بناتے وقت احتیاط کریں جبکہ پولیس سے مطالبہ کیا ہے کہ ڈاکوؤں کے خلاف فوری کارروائی کی جائے تاکہ یوٹیوبرز اور عام شہری محفوظ رہ سکیں۔