وزیراعلیٰ خیبر پختونخوا محمد سہیل آفریدی کا قافلہ اسٹریٹ موومنٹ کے سلسلے میں پشاور سے ہری پور کے لیے روانہ ہو گیا۔ ان کی آمد پر ہری پور میں سیاسی فضا گرم ہو گئی ہے اور استقبال کی تیاریاں زور و شور سے جاری ہیں۔ ذرائع کے مطابق وزیراعلیٰ سہیل آفریدی آج حطار انٹرچینج سے ہری پور میں داخل ہوں گے جہاں کارکنان اور حامیوں کی بڑی تعداد ان کا استقبال کرے گی۔ شہر کے مختلف مقامات پر سٹیجز کی تیاری کی جا رہی ہے، خاص طور پر جی ٹی روڈ چوک صدیق اکبر میں مرکزی اسٹیج قائم کیا جا رہا ہے۔ مین جی ٹی روڈ پر پارٹی کارکنان کی آمد کا سلسلہ جاری ہے جبکہ سیکیورٹی اور ٹریفک کے خصوصی انتظامات بھی کیے جا رہے ہیں تاکہ عوامی اجتماعات باحفاظت منعقد ہو سکیں۔ شیڈول کے مطابق وزیراعلیٰ سہیل آفریدی کوٹ نجیب اللہ، کانگڑہ، جی ٹی روڈ، سرائے صالح اور لورا چوک میں عوامی اجتماعات سے خطاب کریں گے، جہاں وہ موجودہ سیاسی صورتحال، عوامی مسائل اور مستقبل کے لائحہ عمل پر روشنی ڈالیں گے۔