ملک میں توانائی کے بحران پر قابو پانے کے لیے ایک بڑی اور اہم کامیابی سامنے آئی ہے۔ آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے سندھ کے ضلع سانگھڑ میں تیل اور گیس کا ایک نیا بڑا ذخیرہ دریافت کرلیا ہے۔ یہ ذخائر بوبی مائننگ لیز کے "بوبی ڈیپ-ون" کنویں سے دریافت ہوئے ہیں، جہاں سمبڑ فارمیشن میں کنویں کو 3 ہزار 305 میٹر کی گہرائی تک کھودا گیا۔ او جی ڈی سی ایل نے اس اہم پیشرفت کے بارے میں حکومت اور اپنے شیئر ہولڈرز کو باقاعدہ خط کے ذریعے آگاہ کر دیا ہے۔ یہ کنواں 100 فیصد او جی ڈی سی ایل کی ملکیت ہے۔ کمپنی کے مطابق، اس نئے کنویں سے یومیہ 2 ہزار بیرل تیل حاصل ہوگا، جبکہ گیس کی ابتدائی پیداوار کا تخمینہ 11 لاکھ اسٹینڈرڈ کیوبک فٹ (MMCFD) یومیہ لگایا گیا ہے۔ ماہرین کا کہنا ہے کہ کنویں سے حاصل ہونے والی تیل کی یہ یومیہ مقدار انتہائی قابل ذکر ہے، اور او جی ڈی سی ایل کے مطابق اس نئی دریافت سے ملک میں تیل و گیس کی طلب اور رسد کے فرق کو کم کرنے میں بڑی مدد ملے گی۔