پاکستان کی سائبر اسپیس کے تحفظ اور سائبر سیکیورٹی کے شعبے میں پیشہ ور افرادی قوت کی تیاری کے لیے نیشنل سائبر ایمرجنسی رسپانس ٹیم نے سائبر سیکیورٹی انٹرن شپ پروگرام شروع کرنے کا اعلان کردیا ہے۔
پروگرام کے تحت زیرِ تعلیم طلبہ اور حالیہ گریجویٹس کو چھ ہفتوں پر مشتمل عملی تربیت فراہم کی جائے گی۔ دلچسپی رکھنے والے امیدوار 16 جون تک آن لائن درخواستیں جمع کرا سکتے ہیں۔
اعلامیے کے مطابق انٹرن شپ پروگرام میں سائبر سیکیورٹی کے مختلف اہم شعبوں بشمول انسڈنٹ رسپانس، تھریٹ انٹیلی جنس، وَلنریبلٹی مینجمنٹ، گورننس، کمپلائنس، ڈیجیٹل فرانزکس، سافٹ ویئر ٹیسٹنگ اور مصنوعی ذہانت (AI) ڈویلپمنٹ سے متعلق تربیت دی جائے گی۔
پروگرام کے دوران شرکاء کو سائبر سیکیورٹی ماہرین کے ساتھ کام کرنے اور حقیقی نوعیت کے سائبر سیکیورٹی منصوبوں میں عملی تجربہ حاصل کرنے کا موقع فراہم کیا جائے گا۔
نیشنل سائبر ایمرجنسی رسپانس ٹیم کے مطابق منتخب امیدواروں کو ماہرین کی جانب سے تربیت اور مینٹورشپ بھی فراہم کی جائے گی، جس کا مقصد نوجوانوں کی پیشہ ورانہ صلاحیتوں میں اضافہ اور ملک میں سائبر سیکیورٹی کے شعبے کو مضبوط بنانا ہے۔