چیئرمین پیپلزپارٹی بلاول بھٹو نے نہروں کا منصوبہ واپس نہ لینے پر حکومت کے ساتھ نہ چلنے کا اعلان کردیا۔ حیدرآباد میں جلسے سے خطاب کرتے ہوئے چیئرمین پی پی بلاول بھٹو نے کہا کہ شیر والوں کا ہر منصوبہ کسان دشمن اور ہاری دشمن ہوتا ہے یہ شیر والے عوام کا خون چوستے ہیں اور کچھ نہیں کرتے، پہلے انہوں نے گندم اسکینڈل کے ذریعے کسانوں کا معاشی قتل کیا، زرعی ٹیکس کے نام پر انہوں نے کسانوں اور ہاریوں کا جینا دوبھر کردیا۔ بلاول بھٹو نے کہا کہ کسانوں اور ہاریوں کے معاشی قتل کا بندوبست تو ہوچکا ہے، اب یہ لوگ کہہ رہے ہیں کہ ریگستان کو زرعی زمین بنائیں گے، یہ لوگ چولستان میں ریگستان پر کاشت کرنا چاہتے ہیں۔ چیئرمین پی پی نے کہا کہ پانی موجود ہی نہیں، قلت ہے تھرپارکر اور چولستان بھی ہمارے ہی علاقے ہیں، کیوں نہیں چاہوں گا کہ تھرپارکر اور چولستان میں ترقی ہو، تھرپارکر اور چولستان کو آباد کرنا ہے تو بسم اللہ مگر دریائے سندھ پر سودا قبول نہیں کریں گے۔بلاول بھٹو نے خبردار کیا کہ نہروں کا منصوبہ نہ روکا تو حکومت کے ساتھ نہیں چل سکتے۔انہوں نے کہا کہ جو بھی وفاق کو کمزور کرنے یا چار بھائیوں کو لڑوانے کی سازش کرے تو پی پی بھرپور جواب دے گی، ایسی پالیسی جس سے وفاق کو کوئی خطرہ ہے تو اس کو روکنے کے لیے بھی صف اول کا کردار پی پی کا ہوگا۔چیئرمین پی پی نے کہا کہ صدر آصف زرداری نے پارلیمنٹ سے خطاب میں کینالز منصوبے کو مسترد کردیا تھا، حکومت کی اتحادی ماننے کے لیے تیار نہیں، صدر تیار نہیں تو ضد کی کیا وجہ ہے۔انہوں نے مزید کہا کہ پیپلزپارٹی اپنے اصولوں سے پیچھے نہیں ہٹ سکتی، حیدرآباد میں عوام نے تمام وفاق دشمنوں کو شکست دی اور پاکستان کھپے کا نعرہ لگایا، 25 اپریل کو سکھر میں تاریخی جلسہ کرنے جارہے ہیں، ہم اپنا مطالبہ دہرائیں گے، وفاق بچائیں گے، کسان اور دریائے سندھ بچائیں گے۔