امیر جماعت اسلامی پاکستان حافظ نعیم الرحمان نے کہا ہے کہ  26 اپریل کو خیبر تا کراچی فلسطینیوں سے اظہار یکجہتی کے لیے مکمل ہڑتال کی جا ئیگی۔اتوار کو اسلام آباد کے زیرو پوائنٹ پر غزہ یکجہتی مارچ کے شرکا سے خطاب کرتے ہوئے ان کا کہنا تھا کہ 26 اپریل کو آزاد کشمیر سمیت ملک بھر میں  ہڑتال ہوگی۔ ’27  اپریل کو آئندہ کے لائحہ عمل کا اعلان کروں گا۔‘حافظ نعیم نے  کہا کہ پاکستان میں حکومت اور اپوزیشن کوئی کام نہیں کر رہی۔ اپنے کام کروانا ہوں تو اسٹیبلشمنٹ سے مذاکرات بھی ہوجاتے ہیں۔’ذاتی مفاد کے لیے تھر پارکر میں پی ٹی آئی اور ن لیگ کا اتحاد ہوجاتا ہے۔ تنخواہوں میں اضافہ کروا لیتے ہیں لیکن امریکہ کی مذمت نہیں کرتے۔‘حافظ نعیم نے کہا کہ وہ تمام سیاسی جماعتوں سے اپیل کرتے ہیں کہ کشمیر اور فلسطین کے معاملے پر ایک ہوجائیں۔’فلسطین کا معاملہ انسانیت کا ہے، بچوں کو شہید کیا جارہا ہے۔‘جماعت اسلامی نے قبل ازیں اعلان کیا تھا کہ ان کی عزہ یکجہتی مارچ آبپارہ چوک سے شروع ہوگی جس کے پیش نظر وفاقی دارالحکومت اسلام آباد میں سکیورٹی کے غیرمعمولی اقدامات  کیے گئے تھے۔اسلام آباد کی انتظامیہ نے احتجاجی مظاہرین کی ممکنہ پیش قدمی روکنے کے لیے ریڈ زون اور اس کے اطراف کے علاقوں میں سکیورٹی ہائی الرٹ کر دی تھی اور ڈی چوک سمیت کئی مقامات پر کینٹینرز لگا کر سڑکیں بھی بند کر دی تھیں۔ جماعت اسلامی کی قیادت نے مارچ کے شرکا کو زیرو پوائنٹ پہنچنے کی ہدایت کر دی تھی (فوٹو: جے آئی ایکس)اراولپنڈی کو اسلام آباد سے ملانے والے فیض آباد انٹرچینج کو بھی کینٹینرز لگا کر بند کر دیا گیا تھا۔تاہم بعد میں جماعت اسلامی نے مارچ کے شرکا کو زیرو پوائنٹ پہنچنے کی ہدایت کر دی جس کے بعد ملک کے مختلف علاقوں سے آنے والے کارکنان زیرو پوائنٹ پہنچے۔اسلام آباد پولیس نے اتوار کو اپنے ایکس اکاؤنٹ پر شہریوں کو متبادل راستوں کے استعمال کا مشورہ دیا تھا۔اتوار کی صبح جماعت اسلامی اسلام آباد کے سیکریٹری اطلاعات عامر بلوچ نے کہا تھا  کہ ’مارچ کی تیاریاں مکمل ہیں اور اسلام آباد کی ہر گلی سے لوگ نکلیں گے۔‘انہوں نے کہا کہ ’مارچ کا مقصد غزہ کے مظلوموں کے ساتھ اظہار یکجہتی کرنا ہے۔ حکومت اوچھے ہتھکنڈوں سے باز رہے اور راستے کھول دے۔‘انتظامیہ نے اسلام آباد اور راولپنڈی کے سنگم پر واقع فیض آباد انٹرچینج کینٹینرز لگا کر بند کر دیا ہے (فوٹو: ویڈیو گریب)عامر بلوچ نے الزام عائد تھا کہ حکومت امریکی خوشنودی کے لیے مارچ کا راستہ روک رہی ہے۔جماعت اسلامی نے آج (پیر) تین بجے سہ پہر آب پارہ چوک سے غزہ یکجہتی مارچ کے آغاز کا اعلان کر رکھا تھا۔اسلام آباد کے تمام داخلی راستوں اور ریڈ زون پولیس کی بھاری نفری تعینات کی گئی ہے (فوٹو: اسلام آباد پولیس)شہر کی سڑکوں پر جماعت اسلامی کی جانب سے آویزاں کیے گئے پوسٹرز میں بتایا گیا تھا کہ یہ مارچ اسلام آباد میں امریکی سفارت خانے کی جانب کیا جائے گا۔جماعت اسلامی کے آفیشل فیس بک پیج پر بتایا گیا تھا کہ ’امیر جماعت حافظ نعیم الرحمان نے تمام قافلوں کو زیروپوائنٹ اسلام آباد جمع ہونے کی ہدایت کی ہے۔‘