بلوچستان کے نامور باکسر شعیب خان زہری ایک بار پھر ملک و قوم کا نام روشن کرنے کے لیے میدان میں اترنے جا رہے ہیں۔ 27 ستمبر کو ترکی کے شہر استنبول میں ہونے والی بین الاقوامی باکسنگ چیمپئن شپ میں ان کی شرکت یقینی قرار دی گئی ہے، جہاں ان کا مقابلہ بھارت کے باکسر ٹھاکر کمار سے ہوگا۔ شعیب خان زہری کا شمار ان باصلاحیت پاکستانی باکسرز میں ہوتا ہے جنہوں نے اپنی محنت، لگن اور مسلسل جدوجہد کے ذریعے عالمی سطح پر پاکستان کا پرچم بلند کیا۔ اس سے قبل بھی وہ کئی بین الاقوامی مقابلوں میں شاندار کارکردگی کا مظاہرہ کرتے ہوئے کامیابیاں سمیٹ چکے ہیں، جس سے نہ صرف بلوچستان بلکہ پورے پاکستان کا نام دنیا بھر میں روشن ہوا۔ شعیب خان زہری نے کہا کہ وہ اس بڑے مقابلے کے لیے بھرپور تیاری کرچکے ہیں اور پرامید ہیں کہ اس بار بھی کامیابی حاصل کر کے پاکستان اور بلوچستان کا سر فخر سے بلند کریں گے۔ ان کا کہنا تھا: "میرا مقصد صرف ذاتی کامیابی نہیں بلکہ اپنے ملک کی عزت اور وقار کے لیے ہر ممکن جدوجہد کرنا ہے۔ اس بار بھی میں بھرپور عزم اور حوصلے کے ساتھ رنگ میں اترنے جا رہا ہوں۔" یہ مقابلہ شعیب خان زہری کے کیریئر کے ساتھ ساتھ پاکستانی کھیلوں کے مستقبل کے لیے بھی ایک اہم سنگ میل کی حیثیت رکھتا ہے۔ ان کی مسلسل فتوحات نوجوان کھلاڑیوں کے لیے مشعلِ راہ ہیں اور انہیں محنت و لگن سے آگے بڑھنے کی ترغیب فراہم کرتی ہیں۔ پاکستان بھر کے عوام اور شائقینِ کھیل کی نظریں اس وقت شعیب خان زہری پر جمی ہیں، جو ایک بار پھر دنیا کو اپنی صلاحیتوں کا لوہا منوانے کے لیے تیار ہیں۔