سرگودھا میں شدید دھند کے باعث پیش آنے والے المناک حادثے میں جاں بحق افراد کی تعداد 14 ہو گئی جبکہ 9 افراد زخمی ہیں۔ ریسکیو حکام کے مطابق منی ٹرک گھلاپور بنگلہ پل سے بے قابو ہو کر خشک نہر میں جا گرا۔ حادثے کے وقت منی ٹرک میں 23 افراد سوار تھے جو ایک جنازے میں شرکت کے لیے جا رہے تھے۔ اطلاع ملتے ہی ریسکیو ٹیموں نے فوری کارروائی کرتے ہوئے لاشوں اور زخمیوں کو ٹی ایچ کیو اسپتال کوٹ مومن منتقل کر دیا۔ ریسکیو حکام کا کہنا ہے کہ دھند کے باعث حدِ نگاہ انتہائی کم تھی جس کے سبب ڈرائیور گاڑی پر قابو نہ رکھ سکا۔ واقعے کے بعد علاقے میں سوگ کی فضا ہے جبکہ اسپتال میں ایمرجنسی نافذ کر دی گئی ہے۔ انتظامیہ نے شہریوں کو دھند کے دوران غیر ضروری سفر سے گریز اور محتاط ڈرائیونگ کی ہدایت کی ہے۔