کشمیر میڈیا سروس کے مطابق نئی دہلی کی بھارتی عدالت نے حریت رہنما اور دخترانِ ملت کی سربراہ آسیہ اندرابی کو ایک سیاسی مقدمے میں مجرم قرار دے دیا ہے۔ عدالت نے اسی مقدمے میں حریت رہنما فہمیدہ صوفی اور ناہیدہ نسرین کو بھی مجرم ٹھہرایا ہے۔ کشمیر میڈیا سروس کا کہنا ہے کہ یہ مقدمات بدنام زمانہ بھارتی نیشنل انویسٹی گیشن ایجنسی (این آئی اے) کی عدالت میں چلائے گئے، جن میں حریت پسند کشمیری خواتین کے خلاف فیصلے سنائے گئے۔ رپورٹ کے مطابق ان مقدمات میں سزاؤں کا اعلان 17 جنوری کو کیا جائے گا۔ کے ایم ایس کے مطابق آسیہ اندرابی کو اپریل 2018 میں گرفتار کیا گیا تھا جبکہ ان کے شوہر عاشق حسین گزشتہ تین دہائیوں سے مختلف مقدمات میں بھارتی قید کا سامنا کر رہے ہیں۔ کشمیر میڈیا سروس نے ان مقدمات کو سیاسی اور بے بنیاد قرار دیا ہے۔