سابق وزیرِ اعظم عمران خان کی اہلیہ بشرٰی بی بی حال ہی میں جیل سے ضمانت پر رہا ہونے کے بعد پہلی مرتبہ منظر عام پر آئی ہیں اور ان کے سعودی عرب کے حوالے سے ایک بیان کی وجہ سے پاکستان تحریک انصاف (پی ٹی آئی) کو سخت تنقید کا سامنا کرنا پڑ رہا ہے۔جمعرات کے روز پی ٹی آئی کی جانب سے جاری کردہ ایک ویڈیو بیان میں بشرٰی بی بی نے متعدد دعوے کیے۔ ان میں سابق وزیر اعظم عمران خان کے سعودی عرب کے دورے پر ننگے پاؤں جانے اور اس کے بعد اس وقت کے آرمی چیف جنرل قمر ریٹائرڈ قمر جاوید باجوہ کو موصول ہونے والی مبینہ کالز کا معاملہ نمایاں طور پر پاکستان میں زیر بحث ہے۔اپنے بیان میں بشرٰی بی بی نے دعویٰ کیا کہ ’عمران خان کے خلاف جو ساری قوتیں کھڑی ہو گئیں اس کی وجہ کیا ہے جو آج تک کسی نے آپ کو نہیں بتائی؟ عمران خان جب سب سے پہلے ننگے پاؤں مدینہ گئے اور واپس آئے تو جنرل باجوہ کو کالز آنا شروع ہو گئیں کہ یہ تم کیا اٹھا کر لے آئے ہو۔‘انھوں نے مزید کہا کہ ’ہم تو ملک میں شریعت ختم کرنے لگے ہیں اور تم شریعت کے ٹھیکیداروں کو لے آئے ہو۔ ہمیں یہ نہیں چاہیے۔ اس کے بعد سے عمران خان اور اس کی بیگم کے خلاف میڈیا میں گند ڈالنا شروع کر دیا گیا، عمران خان کو یہودی ایجنٹ کہنا شروع کیا گیا۔‘’اگر یہ بات غلط ہو تو آپ باجوہ اور ان کے خاندان سے پوچھیں کیونکہ باجوہ اور ان کے خاندار نے یہ باتیں کسی کو بتائی تھیں جو کسی تک پہنچی تھیں۔‘انھوں نے مزید کہا کہ ’جب آپ اقتدار میں ہوتے ہیں تو ادارے بھی آپ کو رپورٹس دیتے ہیں۔ انھوں نے بھی عمران خان کو یہ بتایا تھا کہ اصل کہانی یہ کہ عمران خان آپ کو ملک، حقیقی آزادی، انصاف اور ننگے پاؤس مدینہ کی سرزمین پر چلنے کی سزا دی جا رہی ہے۔‘ان کا یہ بیان اس وقت سامنے آیا ہے جب سابق وزیراعظم عمران خان کی جماعت نے اتوار کے روز ملک بھر میں احتجاج کی کال دے رکھی ہے۔ بشریٰ بی بی نے اپنے بیان میں اس کا تذکرہ کرتے ہوئے کہا کہ وہ عمران خان کا پیغام پہنچا رہی ہیں کہ تمام لوگ اتوار کے روز احتجاج کے لیے گھروں سے باہر نکلیں۔Getty Imagesتاہم بشرٰی بی بی کے ویڈیو بیان کو حکومتی حلقوں کی طرف سے سخت تنقید کا نشانہ بنایا جا رہا ہے۔ حکومتی وزرا نے الزام عائد کیا ہے کہ بشرٰی بی بی نے اپنے بیان سے پاکستان اور سعودی عرب کے سفارتی تعلقات کو نقصان پہنچانے کی کوشش کی ہے۔بعض سیاسی ماہرین کے خیال میں بشرٰی بی بی کی جانب سے ایسا بیان اس موقع پر دانستاً سامنے لایا گیا ہے اور اس کی وجہ اتوار کے روز پی ٹی آئی کا احتجاج ہو سکتا ہے۔سعودی عرب میں پاکستانیوں کو سزائے موت: ’معلوم نہیں بھائی کی لاش کہاں دفن ہے‘ریاض سیزن: سعودی فیشن شو میں ’شیشے کا کیوب‘ اور کعبہ سے مماثلت کا تنازع تیل، طاقت اور 45 کروڑ ڈالر کی تصویر: سعودی ولی عہد ’ایم بی ایس‘ کی گمنامی سے عروج کی کہانیکلیدِ کعبہ کے محافظ کی وفات: وہ خاندان جو ’ہمیشہ کے لیے‘ خانہ کعبہ کی چابی کا رکھوالا ہے’پی ٹی آئی بیانیے کی تلاش میں‘پاکستانی سیاست میں سعودی عرب کا ذکر کوئی نئی بات نہیں اور اس سے قبل بھی سعودی حکمرانوں کا پاکستان کی سیاست میں کردار رہا ہے۔جب 1999 میں جنرل ریٹائرڈ پرویز مشرف نے سابق وزیرِ اعظم نواز شریف کی حکومت کا تختہ پلٹا اور انھیں قانونی مسائل کا سامنا ہوا تو نواز شریف بھی مبینہ ڈیل کے نتیجے میں جلا وطنی کاٹنے سعودی عرب ہی گئے تھے۔ایسا بھی پہلی بار نہیں ہوا کہ عمران خان کی سیاست کے حوالے سے سعودی عرب کا ذکر سامنے آیا ہو۔عمران خان کی حکومت اور سعودی عرب کے درمیان تعلقات اس وقت خراب ہوتے ہوئے نظر آئے جب اس وقت کے وزیرِ خارجہ شاہ محمود قریشی نے کشمیر کے معاملے پر سعودی عرب سے کُھل کر شکوہ کیا۔انڈیا کی جانب سے جب اس کے زیرِ انتظام کشمیر کی خصوصی حیثیت ختم کرنا کا ایک سال مکمل ہوا تو شاہ محمود قریشی نے کہا تھا کہ ’آج میں اسی دوست ملک (سعودی عرب) سے کہہ رہا ہوں کہ پاکستان کا مسلمان اور وہ پاکستانی جو آپ کے لیے لڑ مرنے کو تیار ہے آج وہ آپ سے تقاضا کر رہا ہے کہ آپ (کشمیر کے معاملے پر) وہ قائدانہ کردار ادا کریں جو مسلم امہ آپ سے توقع کر رہی ہے۔۔۔ اور اگر نہ کیا تو میں عمران خان سے کہوں گا کہ ’سفیر کشمیر‘ اب مزید انتظار نہیں ہو سکتا۔ ہمیں آگے بڑھنا ہوگا۔ سعودی عرب کے ساتھ یا اس کے بغیر۔‘تاہم اس بیان کے بعد اس وقت کی حکومت شدید تنقید کی زد میں آئی اور انھیں سعودی عرب کے حوالے سے کئی وضاحتیں جاری کرنی پڑیں۔اب ایک بار پھر سعودی عرب کے حوالے سے ہی ایک بیان کے سبب سابق وزیرِ اعظم عمران خان کی جماعت ایک بار پھر تنقید کی زد میں ہے۔صحافی اور تجزیہ کار راشد رحمان کے خیال میں بشرٰی بی بی کے اس وقت اس قسم کے بیان کی وجہ یہ ہے کہ پی ٹی آئی ’اس وقت بے چینی سے ایسے بیانیے کی تلاش میں ہے جس سے وہ بتا سکے کہ باہر سے مداخلت کی وجہ سے عمران خان کو اقتدار سے نکالا گیا۔‘بی بی سی سے بات کرتے ہوئے انھوں نے کہا کہ اس سے پہلے پی ٹی آئی نے امریکہ اور خاص طور پر ڈونلڈ لو کو اس بیانیے کے لیے استعمال کیا کہ بیرونی مداخلت کی وجہ سے ان کی حکومت ختم ہوئی۔’لیکن اس کے بعد پھر پی ٹی آئی ہی نے امریکہ میں لابنگ کرتے ہوئے عمران خان اور ان کی جماعت کے لیے امریکی کانگریس کے ذریعے ریلیف لینے کی کوششیں بھی کی ہیں۔‘وہ کہتے ہیں کہ اب اس میں سعودی عرب کو بھی اس بیانیے میں شامل کرنے کی کوشش کی گئی ہے۔ تاہم راشد رحمان سمجھتے ہیں کہ بشرٰی بی بی کے بیان کی صداقت کے حوالے سے شکوک و شبہات ہیں۔Getty Imagesوہ کہتے ہیں کہ وہ جس دورے کا ذکر کر رہی ہیں یہ وہ دورہ تھا جس پر عمران خان اور ان کی اہلیہ نے سعودی شاہی خاندان کی طرف سے کئی تحائف وصول کیے جو بعد میں پاکستان میں ان کے لیے مسائل کی وجہ بھی بنے۔’اگر سعودیز کو ان کا ننگے پاوں مدینہ آنا اتنا برا لگا ہوتا تو وہ ان کو اتنے مہنگے تحائف سے بالکل نہ نوازتے۔‘وہ سمجھتے ہیں کہ یہ بات ہے کہ سعودی عرب کے حکام عمران خان سے زیادہ خوش نہیں تھے کیونکہ انھوں نے انڈونیشیا کے مہاتیر محمد کے ٍذریعے او آئی سی میں سعودی اثر و رسوخ کو متاثر کرنے کی کوشش کی تھی۔’لیکن صرف اس بات پر سعودی عرب عمران خان کی حکومت ختم کروانا چاہے گا یہ ماننا قدرے مشکل ہے۔‘کیا اس سے پی ٹی آئی یا عمران خان کو سیاسی نقصان ہو سکتا ہے؟صحافی اور تجزیہ نگار راشد رحمان کے خیال میں سعودی عرب کے حوالے سے اس قسم کے بیان سے پی ٹی آئی کو سیاسی طور پر نقصان ہی ہو سکتا ہے، فائدہ نہیں۔وہ کہتے ہیں کہ سعودی عرب کے حوالے سے یہ بات پاکستان میں سب جانتے ہیں کہ اس نے مشکل وقت میں پاکستان کا ساتھ دیا ہے۔ اس میں حالیہ مثالیں موجود ہیں جہاں سعودی عرب نے پاکستان کے زرِ مبادلہ کو متوازن بنانے میں مدد کی اور حال ہی میں پاکستان میں سرمایہ کاری کے معاہدے بھی کیے ہیں۔وہ سوال کرتے ہیں کہ ’اس موقع پر اس قسم کے بیان سے پی ٹی آئی کو فائدہ کیا ہو سکتا ہے؟ اس میں تو صرف سیاسی طور پر نقصان ہی نظر آتا ہے۔ اس سے عمران خان کے لیے مشکلات بڑھیں گی، کم نہیں ہوں گی۔‘’اب ایسا محسوس ہوتا ہے کہ پی ٹی آئی کے پاس کوئی نیا بیانیہ اس کے علاوہ باقی نہیں رہا کہ ان کی حکومت کو بیرونی طاقتوں نے ختم کروایا یا پھر یہ کہ الیکشن میں ان کا مینڈیٹ چوری کیا گیا ہے۔‘دوسری جانب پی ٹی آئی کے رہنما زلفی بخاری نے بشریٰ بی بی کے بیان کا دفاع کرتے ہوئے کہا ہے کہ ’یہ بشریٰ بی بی کے الفاظ کو توڑ مروڑ کر پیش کرنے کی کوشش ہے جو ناقابلِ قبول ہے۔‘’عمران خان، بشریٰ بی بی اور پاکستان کے لوگوں کے سعودی عرب اور اس کی قیادت کے ساتھ بہترین تعلقات ہیں۔‘اس حوالے سے لکھتے ہوئے انھوں نے مزید کہا کہ ’یہ واضح ہے کہ ان کا مطلب یہ تھا کہ یہ تعصب جنرل باجوہ اور ان کے حواریوں کی وجہ سے تھا جو عمران خان کے شلوار قمیض پہننے اور بشریٰ بی بی کے پردہ کرنے کے مخالف تھے۔‘Getty Imagesتاہم پاکستانی میڈیا پر سابق فوجی سربراہ جنرل باجوہ سے منسوب ایک بیان بھی گردش کر رہا ہے جس کے مطابق جنرل ریٹائرڈ باجوہ نے بشریٰ بی بی کے بیان کو غیر ذمہ دارانہ اور بے بنیاد قرار دیا ہے۔سعودی عرب کو سیاسی مقاصد کے لیے نشانہ بنانا افسوسناک ہے: شہباز شریفپاکستان کے حکومتی وزرا کی جانب سے بشرٰی بی بی کے ویڈیو بیان پر فوری رد عمل سامنے آیا جس میں سعودی عرب کے حوالے سے ان کے دعوؤں اور الزامات کو تنقید کا نشانہ بنایا گیا ہے۔جمعے کو ایک خطاب کے دوران پاکستان کے وزیرِ اعظم شہباز شریف نے بشرٰی بی بی کے بیان کو ’پاکستان دشمنی‘ قرار دیا۔ان کا کہنا تھا کہ ’جو ہاتھ پاکستان اور سعودی عرب کے تعلقات میں رُکاوٹ بنے گا اسے توڑ دیں گے۔‘نائب وزیرِ اعظم اور وزیرِ خارجہ اسحاق ڈار نے کہا ہے کہ سعودی عرب نے ہر مشکل وقت میں پاکستان کا ساتھ دیا اور ’ہمیں سعودی عرب سے قریبی تعلقات پر فخر ہے۔‘انھوں نے کہا کہ ’سعودی عرب کو سیاسی مفادات کے لیے نشانہ بنانا افسوسناک ہے۔ سیاسی قوتیں اپنے مقاصد کے لیے خارجہ پالیسی پر سمجھوتہ کرنے سے باز رہیں۔‘دوسری جانب وزیر دفاع خواجہ آصف نے بشریٰ بی بی کے بیان پر رد عمل دیتے ہوئے کہا ہے کہ ’اب شریعت کارڈ کا بھی استعمال ہو گا۔‘تاہم پی ٹی آئی کے کچھ رہنما بشرٰی بی بی کے بیان کو ان کا ’انفرادی بیان‘ قرار دے رہے ہیں۔پی ٹی آئی کا مؤقف کیا ہے؟خیبرپختونخوا کے وزیرِ اعلی کے مشیر اطلاعات بیرسٹر سیف کا کہنا ہے بشریٰ بی بی کے بیان کا پارٹی سے تعلق جوڑنا بے بنیاد ہے کیونکہ سابق خاتونِ اول کے پاس کوئی تنظیمی عہدہ نہیں ہے۔بیرسٹر سیف نے کہا ہے کہ بشریٰ بی بی کے پاس پارٹی کا کوئی تنظیمی عہدہ نہیں ہے نہ ہی پارٹی کی کوئی سیاسی یا تنظیمی ذمہ داری ہے۔’وہ اگر کوئی بات کرتی ہیں تو یہ وضاحت کریں گی کہ یہ میرا ذاتی بیان ہے یا پارٹی کا بیان ہے۔ پارٹی کا مؤقف تو چیئرمین یا پارٹی کا سیکریٹری جنرل ہی بیان کرے گا۔‘ان کا مزید کہنا تھا کہ ’عمران خان کی اہلیہ محترمہ اگر یہ سمجھتی ہیں کہ ایسی بات ہے تو اس میں پارٹی کا کیا ردِ عمل ہو سکتا ہے، یہ ان کا نقطۂ نظر ہے اور اگر اس سے کوئی پارٹی کا تعلق جوڑتا ہے تو بے بنیاد نسبت جوڑی جا رہی ہے۔‘Getty Images’اگر پارٹی میں کوئی سمجھتا ہے کہ عمران خان کو سعودی عرب نے سزا دلوائی ہے یا ہٹایا ہے تو اس پر پارٹی نے کچھ نہیں کیا ہے نہ عمران خان نے کوئی ایسی بات کی ہے۔‘لیکن پاکستانی سیاست پر گہری نظر رکھنے والے تجزیہ کار سمجھتے ہیں کہ سعودی عرب کے خلاف بشریٰ بی بی کے بیان پی ٹی آئی کے لیے نقصان کا باعث بنے گا۔لاہور میں مقیم تجزیہ کار سلمان غنی کے مطابق ’پی ٹی آئی کو وضاحتیں جاری کرنے کے بجائے اس بیان پر معذرت کرنی چاہیے اور اس سے لاتعلقی کا اظہار کرنا چاہیے۔‘’اس موقع پر بشریٰ بی بی کے خطاب اور سعودی عرب کے حوالے سے بیان نے جماعت کو پریشان کردیا ہے اور پوری جماعت اب ایک دفاعی پوزیشن میں نظر آتی ہے۔‘لیکن پی ٹی آئی کا ماننا ہے کہ بشریٰ بی بی کے اس بیان کو ان کے مخالفین 24 نومبر کے احتجاج کو ناکام بنانے کے لیے استعمال کر رہے ہیں۔زلفی بخاری اس حوالے سے کہتے ہیں کہ ’یہ مایوس کن اور مضحکہ خیز حربہ‘ پاکستان میں 24 تاریخ کو لوگوں کا جذبہ کم نہیں کر پائے گا۔پی ٹی آئی کا ممکنہ احتجاج اور مذاکرات کی گونج: ’یہ مل بیٹھ کر بات کیوں نہیں کرتے، ہماری جان کیوں نہیں چھوڑتے‘بشریٰ بی بی کی مبینہ آڈیو کا معاملہ: کوئی آڈیو اصلی ہے یا جعلی، یہ کیسے معلوم کیا جائے؟اڈیالہ جیل سے بنی گالہ تک: سب جیل کیا ہوتی ہے اور کیا بشریٰ بی بی کو خلاف قانون یہ سہولت فراہم کی گئی ہے؟عمران خان کی بشریٰ بی بی سے شادی کی تصدیقفرح خان: عمران خان کی اہلیہ بشریٰ بی بی کی دوست کون ہیں؟