شہر قائد میں سمندری ہوائیں بحال ہوتے ہی بدھ کی سہ پہر سے گرمی میں کمی واقع ہوگئی۔ موسمیاتی تجزیہ کار جواد میمن کے مطابق کراچی میں آج سمندری ہوائیں بحال ہوگئی ہیں، 25 سے 30کلومیٹر فی گھنٹہ کی رفتار سے سمندری ہوائیں چلتی رہیں گی جبکہ شام تک ان ہواؤں کی رفتار میں مزید اضافہ ہوسکتا ہے۔ جواد میمن کے مطابق شہر میں آج زیادہ سے زیادہ درجہ حرارت 34 سے 36 سینٹی گریڈ تک رہ سکتا ہے تاہم گرمی کی شدت 40 سے 44 ڈگری تک محسوس کی جاسکتی ہے۔ ان کا کہنا ہےکہ کئی روز سے شہر میں جاری گرم موسم کی شدت میں کمی ریکارڈ ہوئی ہے جبکہ آج مطلع ابر آلود رہے گا۔