پاک بحریہ نے شمالی بحیرۂ عرب میں جدید ایف ایم-90 (این) ای آر سطح سے فضا میں مار کرنے والے میزائل کا کامیاب لائیو ویپن فائرنگ تجربہ کیا ہے، جس کے دوران فضائی اہداف کو انتہائی مؤثر انداز میں نشانہ بنایا گیا۔
آئی ایس پی آر کے مطابق فائر پاور مظاہرے کے دوران پاکستان بحریہ کے ایک جہاز نے تیز رفتار ردعمل کا مظاہرہ کرتے ہوئے مقررہ فضائی اہداف کو کامیابی سے تباہ کیا، جس سے بحریہ کی جدید جنگی صلاحیتوں اور اعلیٰ سطح کی آپریشنل تیاری کا عملی اظہار ہوا۔
اس موقع پر کمانڈر پاکستان فلیٹ ریئر ایڈمرل نے فائر پاور کے مظاہرے کا مشاہدہ کیا۔انہوں نے افسران اور جوانوں کی پیشہ ورانہ مہارت، عزم اور آپریشنل قابلیت کو سراہا۔
کمانڈر پاکستان فلیٹ نے اس موقع پر کہا کہ پاکستان بحریہ ملک کے بحری دفاع اور قومی سمندری مفادات کے تحفظ کے لیے ہر وقت مکمل طور پر تیار اور پرعزم ہے۔