’’ایک اداکارہ ہے جسے میں صرف اس لیے جانتی ہوں کیونکہ اُس کا شوہر اُسے تحفے دیتا رہتا ہے‘‘ ریحام خان نے سارہ خان کے حالیہ بیان پر سخت ردِعمل دیا ہے، جس میں سارہ خان نے خود کو ’’فیمینسٹ‘‘ ماننے سے انکار کیا تھا۔ سارہ نے ایک انٹرویو میں کہا تھا کہ وہ پرانی سوچ رکھتی ہیں، اُنہیں یہ اچھا لگتا ہے کہ اُن کے شوہر تمام بلز ادا کرتے ہیں اور وہ خود لائن میں کھڑے ہو کر ادائیگیاں نہیں کر سکتیں۔ اس بیان پر ریحام خان نے سوشل میڈیا کے ذریعے شدید تنقید کرتے ہوئے کہا: ’’ایک اداکارہ ہے جسے میں صرف اس لیے جانتی ہوں کیونکہ اُس کا شوہر اُسے گفٹ دیتا رہتا ہے۔ اُسے شاید یاد نہیں کہ آج وہ آزادانہ طور پر اداکاری کر رہی ہے تو وہ فیمینزم کی مرہونِ منت ہے۔ اگر ماضی میں خواتین کے حقوق کے لیے آواز بلند نہ کی جاتی تو آج یہ اداکارائیں بھی اپنی مرضی سے کام نہ کر سکتیں۔‘‘ انہوں نے مزید کہا: ’’یہ کہنا کہ 'میں فیمینسٹ نہیں ہوں' ایک پسماندہ سوچ کی نمائندگی کرتا ہے۔ اگر آپ خود کو خوش نصیب سمجھتی ہیں کہ آپ کا شوہر آپ کے بلز ادا کرتا ہے تو یہ آپ کا ذاتی تجربہ ہو سکتا ہے، مگر ہر عورت اتنی خوش قسمت نہیں ہوتی۔ جو لوگ بااثر مقام پر ہوتے ہیں، اُن پر لازم ہے کہ وہ ان لوگوں کے حق میں آواز بلند کریں جو یہ سہولتیں نہیں رکھتے۔‘‘ ریحام خان کا یہ بیان سوشل میڈیا پر تیزی سے وائرل ہو رہا ہے، اور سارہ خان کے مداحوں اور مخالفین کے درمیان بحث چڑھ گئی ہے۔ کچھ صارفین نے ریحام کی بات سے اتفاق کیا کہ سارہ جیسی اداکاراؤں کو اپنی حیثیت اور آزادی کے پیچھے کی جدوجہد کو تسلیم کرنا چاہیے، جبکہ دوسروں نے سارہ کی ذاتی پسند کو ان کا حق قرار دیا۔ یاد رہے کہ سارہ خان اور ان کے شوہر، گلوکار فلک شبیر، اپنے محبت بھرے تعلق اور دلکش اندازِ زندگی کے باعث مداحوں میں بے حد مقبول ہیں۔ فلک شبیر کا سارہ کو پھول دینا، تحفے دینا اور بیرونِ ملک چھٹیاں منانا اکثر سوشل میڈیا پر زیرِ بحث رہتا ہے۔ تاہم سارہ کے حالیہ بیان نے اُن کے شائقین کو بھی تقسیم کر دیا ہے۔