اداکارہ عائشہ خان کی وفات کی خبر جون میں سامنے آئی، جب ان کی لاش کئی دن بعد ان کے گھر سے ملی۔ اس افسوسناک واقعے کے بعد سوشل میڈیا پر ان کے بچوں کے خلاف شدید تنقید کی گئی کہ وہ اپنی ماں کے آخری وقت میں ان کے ساتھ موجود نہیں تھے۔ تاہم حالیہ دنوں میں سینئر فنکار اسلم شیخ اور بشریٰ انصاری نے اس معاملے کی اصل تصویر واضح کی ہے۔ بشریٰ انصاری نے کہا’’عائشہ خان کی موت کی خبر میرے لیے انتہائی افسوسناک تھی، لیکن سوشل میڈیا پر پھیلنے والی باتوں نے مجھے مزید پریشان کر دیا۔ جی ہاں، ان کے بچے بیرونِ ملک تھے، مگر حالات ویسے نہیں جیسے سوشل میڈیا پر بیان کیے جا رہے ہیں۔ ہم نے چند برس پہلے ایک ساتھ کام کیا، اس دوران انہوں نے بتایا کہ ان کے بچے باہر سیٹل ہیں، وہ ان کا خیال رکھتے ہیں اور چاہتے تھے کہ وہ ان کے ساتھ رہیں، لیکن انہوں نے انکار کر دیا۔ کچھ لوگ اکیلے رہنے کو ترجیح دیتے ہیں، جیسے میری بہن نیلم۔ ان کے بچے بھی چاہتے ہیں کہ وہ باہر رہیں، لیکن وہ پاکستان میں اطمینان سے زندگی گزار رہی ہیں۔‘‘ انہوں نے مزید بتایا ’’میں نے عائشہ سے پوچھا کہ کیا بچے ان کی مالی مدد کرتے ہیں؟ تو انہوں نے ہنستے ہوئے کہا کہ وہ درازوں میں بڑی بڑی رقم چھوڑ جاتے ہیں۔ وہ گلشنِ اقبال میں اپنی زندگی سے خوش تھیں، کتابیں پڑھنا، اپنی دلچسپ سرگرمیوں میں وقت گزارنا ان کو پسند تھا۔ وہ ایک خوددار، مضبوط اور پڑھی لکھی خاتون تھیں۔ اللہ انہیں جنت الفردوس میں اعلیٰ مقام عطا فرمائے۔‘‘ اداکار اسلم شیخ نے بھی عائشہ خان کی زندگی کے بارے میں سچائی بتاتے ہوئے کہا ’’ہم سب نے ایک دن جانا ہے، اللہ عائشہ آپا پر رحم کرے۔ وہ خودمختار تھیں، اپنی گاڑی خود چلاتی تھیں، کسی پر انحصار نہیں کرتی تھیں۔ ان کے والد ڈی ایس پی تھے، اور وہ خالہ خالدہ ریاست کی بہن تھیں۔ شوبز نے سچّے فنکاروں کو نظرانداز کیا، اور بڑی عمر کے کرداروں میں بھی نوجوانوں کو کاسٹ کیا جانے لگا، اس لیے عائشہ خان نے کام سے کنارہ کشی اختیار کی۔‘‘ انہوں نے کہا ’’عائشہ آپا کے بچے ان کا بھرپور خیال رکھتے تھے۔ ان کی بیٹی چاہتی تھی کہ وہ دبئی آ جائیں، بیٹا بیرون ملک سے رابطے میں تھا، مگر وہ پاکستان میں اپنے معمولات کے ساتھ مطمئن تھیں۔ وہ ہمایوں سعید کی پسندیدہ فنکارہ تھیں، مگر آخری دنوں میں انہوں نے کام سے انکار کر دیا تھا۔ میں نے ان سے چار دن پہلے فون پر بات کی، ان کی ٹانگ میں فریکچر تھا، پھر عید آ گئی اور رابطہ نہ ہو سکا۔ ان کی لمبی وائس نوٹس میرے پاس محفوظ ہیں، جو ان کی زندگی کی گواہی دیتے ہیں کہ وہ تنہا تھیں، مگر پریشان نہیں تھیں۔‘‘ عائشہ خان کے انتقال کے بعد یہ تاثر دیا گیا کہ وہ تنہا، بے سہارا اور نظرانداز تھیں، لیکن ان کے قریبی ساتھیوں کے بیانات سے واضح ہوتا ہے کہ وہ اپنی مرضی سے تنہا رہ رہی تھیں، اور ان کے بچوں نے ہمیشہ ان کا ساتھ دیا۔ سوشل میڈیا پر بغیر تحقیق کے پھیلنے والی خبروں نے صرف غلط فہمیاں پیدا کیں۔ عائشہ خان، جو ’’آفشاں‘‘، ’’مہندی‘‘، ’’میرات العروس‘‘ اور ’’میری گڑیا‘‘ جیسے کامیاب ڈراموں کا حصہ رہیں، اپنی فنی زندگی کے ساتھ ساتھ نجی زندگی میں بھی ایک باوقار اور خوددار شخصیت کی مالک تھیں۔ ان کی زندگی اور موت ہمیں یہ سکھاتی ہے کہ کبھی کبھار تنہائی خود کی پسند ہوتی ہے، مجبوری نہیں۔