راولپنڈی میں 16 سال کی بیٹی کو ٹک ٹاک اکاؤنٹ ختم نہ کرنے پر قتل کر کے فرار ہونے والے شخص کو پولیس نے گرفتار کر لیا ہے۔بدھ کو سامنے آنے والی ایف آئی آر کے مطابق یہ واقعہ روات کے علاقے ڈھوک چوہدریاں تخت پڑی میں منگل کو پیش آیا تھا۔ملزم اخلاق نے بیٹی مہک شہزادی کو موبائل سے ٹک ٹاک اکاؤنٹ ڈیلیٹ کرنے کا کہا تھا تاہم ایسا نہ کرنے پر اس نے بیٹی پر فائرنگ کردی اور موقعے سے فرار ہو گیا۔پولیس کا کہنا ہے کہ ’مہک شہزادی کے اہلِ خانہ نے ابتدائی طور پر اس قتل کو خودکشی کا رنگ دینے کی کوشش کی۔‘’تاہم شک ہونے پر تحقیقات شروع کیں تو جلد ہی معلوم ہو گیا کہ یہ خودکشی کا واقعہ نہیں ہے بلکہ قتل کی واردات ہے۔‘’مقتولہ کے پیٹ پر گولیوں کے نشانات پائے گئے تھے جبکہ گھر کے اندر سے گولیوں کے خول بھی برآمد ہوئے۔‘پولیس کے مطابق ’جائے وقوعہ سے تمام شواہد اکٹھے کر کے لاش کا پوسٹ مارٹم کروایا گیا اور اس واقعے کا مقدمہ بھی درج کر لیا گیا ہے۔‘اس مقدمے کے متن میں کہا گیا ہے کہ ’ملزم اخلاق نے طیش میں آکر غیرت کے نام پر بیٹی کو گولی مار کر قتل اور فساد فی الارض کا ارتکاب کیا ہے۔‘