وزیراعلیٰ بلوچستان میر سرفراز بگٹی نے واضح کیا کہ دہشت گردوں کو ہر حال میں کیفر کردار تک پہنچایا جائے گا اور ان کا تعاقب آخری حد تک کیا جائے گا۔ انھوں نے اعلیٰ سطحی اجلاس میں دہشت گردوں کے خلاف سخت ایکشن کا اعلان کرتے ہوئے کہا کہ لیویز اور پولیس کو حدود سے بالاتر ہو کر فوری اور فیصلہ کن کارروائی کرنی ہوگی ،دہشت گردوں کے خلاف بلا تاخیر سخت ایکشن لیا جائے۔ میر سر فراز بگٹی نے متعلقہ حکام کو ہدایت کی کہ دہشت گردی کے واقعات کے رسپانس میکنزم کو مزید مؤثر بنایا جائے۔ انہوں نے کہا کہ امن دشمن عناصر کے ساتھ سختی سے نمٹا جائے گا اور بلوچستان میں قانون کی عملداری پر کوئی سمجھوتہ نہیں ہوگا۔ وزیراعلیٰ بلوچستان میر سرفراز بگٹی کی زیر صدارت امن و امان سے متعلق اعلیٰ سطح کا اجلاس میں سیکیورٹی صورتحال خصوصاً سرہ ڈکئی واقعے پر تفصیلی غور کیا گیا۔ اجلاس میں انسپکٹر جنرل پولیس بلوچستان نے سرہ ڈکئی واقعے پر تفصیلی بریفنگ دی۔ وزیراعلیٰ نے واقعے میں ملوث دہشت گردوں کو ہر صورت منطقی انجام تک پہنچانے کا حکم دیتے ہوئے کہا کہ بلوچستان میں معصوم جانوں کے قاتل کسی رعایت کے مستحق نہیں۔