کارپوریٹ کرائم سرکل کراچی نے کورنگی سے منظم گینگ کے 2 ملزمان کو گرفتار کرلیا، ملزمان کی نشاندہی پر کروڑوں مالیت کی ملکی وغیر ملکی کرنسی برآمد کرلی گئی۔ ملزمان کے خلاف کارروائی خفیہ اطلاع پر کی گئی، ملزمان کورنگی انڈسٹریل ایریا سے حوالہ ہنڈی کی رقم وصول کر رہے تھے، ملزمان حوالہ ہنڈی رقوم کی ترسیل کے لیے موٹر سائیکل استعمال کرتے تھے۔ گرفتار ملزم محمد جنید اور وسیم سے 8 لاکھ روپے برآمد کرلیے گئے، گرفتار ملزمان کی نشاندہی پر سمیعہ لگژری ہومز میں ایف آئی اے نے چھاپہ مار کر گھر سے بڑی مقدار میں پاکستانی و غیر ملکی کرنسی، لیجرز اور شواہد برآمد کرلیے۔ برآمد کرنسی میں 99 لاکھ روپے، 13,500 پاؤنڈ، 6,300 امریکی ڈالر، 14,500 سعودی ریال، 10900 یو اے ای درہم، 1150 یورو اور 8000 تھائی بھات کے علاوہ 23 لاکھ روپے مالیت کے ڈیفنس سیونگ سرٹیفکیٹس بھی شامل ہیں۔ ملزمان کے خلاف مقدمہ درج کرکے تحقیقات شروع کردی گئیں جبکہ دیگر ملزمان کی گرفتاری کے لیے چھاپے مارے جا رہے ہیں۔