وفاقی حکومت نے جدید ٹیکنالوجی کے فروغ کے لیے نیشنل آرٹیفیشل انٹیلیجنس (AI) فنڈ کے قیام کا فیصلہ کر لیا ہے جس کا مقصد ملک میں مصنوعی ذہانت (AI) کے شعبے کو مستحکم اور ترقی یافتہ بنانا ہے۔ تفصیلات کے مطابق اگنائٹ کے ریسرچ اینڈ ڈیولپمنٹ فنڈ کا 30 فیصد حصہ اب نیشنل آرٹیفیشل انٹیلیجنس فنڈ کے لیے مختص کیا جائے گا۔ یہ فنڈ ملک میں AI ٹیکنالوجیز کی ترقی، تحقیق، تربیت اور عملی اطلاق کو فروغ دے گا۔ سینٹرز آف ایکسیلنس ابتدائی طور پر تین بڑے شہروں اسلام آباد، کراچی اور لاہور میں قائم کیے جائیں گے۔ انوویشن فنڈ اور وینچر فنڈ کے قیام کی تجویز بھی زیر غور ہے تاکہ AI سے متعلق اسٹارٹ اپس اور تحقیقی منصوبوں کو مالی معاونت فراہم کی جا سکے۔ اس فنڈ کے ذریعے AI میں مقامی جدت، تحقیق اور ہنر مند افراد کی تیاری پر خصوصی توجہ دی جائے گی۔