بلوچستان کے ضلع دُکی میں افغان پناہ گزینوں کے خلاف جاری آپریشن کے دوران افسوسناک واقعہ پیش آیا، جہاں گرفتاری کے خوف سے کوئلہ کان میں چھپنے والا ایک افغان مزدور زہریلی گیس کے باعث دم گھٹنے سے جاں بحق ہوگیا۔
افغان شہری روح اللہ ولد محمد کریم، قوم توخئی ساکن افغانستان، گرفتاری سے بچنے کے لیے کوئلے کی ایک کان میں جا چھپا، جہاں زہریلی گیس کی موجودگی کے باعث اس کا دم گھٹ گیا اور وہ موقع پر ہی دم توڑ گیا۔
واقعے کے بعد مقامی مزدوروں نے لاش کان سے نکال کر قریبی اسپتال منتقل کی۔ ذرائع کے مطابق دُکی میں افغان مہاجرین کے خلاف جاری آپریشن کے دوران کوئلہ کانوں میں کام کرنے والے افغان مزدوروں کی پکڑ دھکڑ کا سلسلہ جاری ہے۔