خیبرپختونخوا کے ضلع لوئر کرم میں نامعلوم افراد نے مسافر گاڑی پر فائرنگ کردی جس کے نتیجے میں 5 افراد موقع پر جاں بحق ہوگئے۔ پولیس کا بتانا ہے کہ واقعہ احمد خان کلے اور مہورہ کے قریب پیش آیا جہاں مسافر گاڑی دڑادار سے صدہ جارہی تھی۔ فائرنگ کے بعد حملہ آور فرار ہوگئے۔ جاں بحق افراد کی لاشوں کو تحصیل ہیڈ کوارٹر اسپتال صدہ منتقل کردیا گیا ہے۔ ملزمان کی تلاش کے لیے پولیس اور سیکیورٹی فورسز نےعلاقے کو گھیرے میں لے کر سرچ آپریشن شروع کردیا ہے۔ ڈی پی او کرم ملک حبیب نے حملے کو علاقے کے امن کو ثبوتاژ کرنے کی کوشش قرار دیتے ہوئے کہا ہے کہ واقعے کی تحقیقات شروع کردی گئی ہیں اور ملزمان کو جلد گرفتار کرلیا جائے گا۔