نائب وزیراعظم و وزیر خارجہ اسحاق ڈار نے کہا ہے کہ سعودی عرب کے بعد کئی دیگر ممالک بھی پاکستان کے ساتھ دفاعی معاہدے کے خواہشمند ہیں۔ پاکستان ہائی کمیشن لندن کے باہر میڈیا سے گفتگو کرتے ہوئے اسحاق ڈار نے کہا کہ پاکستان نے معرکہ حق میں اپنی دفاعی صلاحیت ثابت کر دی ہے اب وقت ہے کہ ملک معاشی طور پر بھی دنیا میں اپنی حیثیت منوائے۔ انہوں نے کہا کہ پاک سعودی دفاعی معاہدہ دونوں ممالک کے مشترکہ مفاد میں ہے اور اس پر کسی تیسرے ملک کو کوئی اعتراض نہیں۔ ان کا کہنا تھا کہ معاہدے کے بعد کئی ممالک نے پاکستان کے ساتھ اسی نوعیت کے دفاعی تعاون کی خواہش ظاہر کی ہے۔ اسحاق ڈار کا کہنا تھا کہ پاکستان نے عالمی برادری کو یہ پیغام دیا ہے کہ وہ نہ صرف اپنی سرحدوں کے بھرپور دفاع کی صلاحیت رکھتا ہے بلکہ خطے کے امن و استحکام کے لیے بھی اہم کردار ادا کر سکتا ہے۔ واضح رہے کہ 17 ستمبر کو ریاض میں پاکستان اور سعودی عرب کے درمیان تاریخی دفاعی معاہدہ طے پایا تھا جس کے تحت کسی ایک ملک پر حملہ دونوں ممالک پر حملہ تصور کیا جائے گا۔ اس معاہدے کو خطے میں تزویراتی توازن کی بڑی پیش رفت قرار دیا جا رہا ہے۔