حکومت سندھ نے پاکستان کی پہلی حکومتی ٹیکسی سروس اور ای وی ٹیکسی سروس متعارف کروانے کی تیاریاں تیز کر دی ہیں۔ دسمبر 2025 تک عوام کو جدید اور ماحول دوست ای وی ٹیکسی فراہم کرنے کا فیصلہ کیا گیا ہے۔ یہ اعلان سندھ کے سینئر وزیر و صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کراچی میں اجلاس کے بعد کیا۔ اجلاس میں صوبے میں جاری ٹرانسپورٹ منصوبوں پر تفصیلی بریفنگ دی گئی۔ شرجیل انعام میمن نے کہا کہ پاکستان میں پہلی بار حکومت سندھ اپنی ٹیکسی سروس شروع کر رہی ہے اور ای وی ٹیکسی سروس بھی جلد عوام کے لیے دستیاب ہوگی۔ انہوں نے بتایا کہ چیئرمین بلاول بھٹو زرداری اس منصوبے میں خصوصی دلچسپی رکھتے ہیں تاکہ شہریوں کو جدید، ماحول دوست اور معیاری سفری سہولیات فراہم کی جا سکیں۔ ابتدائی مرحلے میں خواتین کے لیے مخصوص ٹیکسیوں کی سہولت بھی دی جائے گی۔ سینئر وزیر نے مزید کہا کہ سندھ نے پہلے بھی خواتین کے لیے ماحول دوست ای وی بسیں، پنک بس سروس اور پنک اسکوٹی پروگرام متعارف کروائی ہے اور اب خواتین کے لیے پنک ای وی ٹیکسی کے ساتھ ملک کی پہلی ای وی ٹیکسی بھی شروع کی جا رہی ہے۔شرجیل انعام میمن نے کہا کہ خواتین کو محفوظ اور سستی سفری سہولیات فراہم کرنا حکومت سندھ کا عزم ہے۔ انہوں نے بتایا کہ کراچی میں ٹرانسپورٹ کے مسائل کم کرنے کے لیے ڈبل ڈیکر بسیں اور مزید ای وی بسیں بھی جلد شامل ہوں گی جبکہ ای وی گاڑیوں کے لیے چارجنگ اسٹیشنز اور انفرااسٹرکچر کی تیاری پر کام جاری ہے تاکہ یہ منصوبہ پائیدار اور کامیاب ثابت ہو۔